Qostanaılyq erikti jastar Tobyl ózenin boılaı ósken qalyń aǵashtyń bir buryshyn qazaqtyń aıbyndy batyry, qaharman jazýshy Baýyrjan Momyshuly atyndaǵy saıabaqqa aınaldyrmaq. Qazir bul jerde burynnan ósip turǵan kári aǵashtar shirı bastaǵan soń kesilip, ózen jaǵalaýyn abattandyrý jumystary júrip jatyr. Eriktiler ashyq qalǵan alańǵa aty ańyzǵa aınalǵan batyrdyń 110 jyldyǵyna arnap jas qaıyń kóshetterin otyrǵyzý týraly usynys tastaǵan eken, jastardyń bul bastamasy qala ákimdiginiń de kóńilinen shyǵyp, qoldaý taýyp otyr, dep habarlaıdy Egemen.kz.
О́tken senbide bas qos qosqan jastar batyr atalarynyń 110 jyldyq mereıtoıyna arnalǵan aǵash kóshetin otyrǵyzdy. Sharaǵa oblys ákiminiń orynbasary Baqyt Esimova men jastar saıasaty basqarmasynyń basshysy Marat Jurqabaev qatysty.
"Baýyrjan Momyshuly sııaqty batyr atamyzdyń erlikke toly ǵumyryn úlgi-ónege etken búgingi jastarymyzdyń jaqsy bastamasy bizdi de qýantyp otyr. Búgin bul alańqaıǵa 110 qaıyń kósheti otyrǵyzylady. Erikti jastar kóshetterdi ýaqtyly sýaryp, kútim jasap turýdy da óz mindetterine alyp otyr. Aldaǵy ýaqytta bul mań qala turǵyndary men jastar serýen quratyn jaıqalǵan saıabaqqa, taza aýa aıasyndaǵy demalys ornyna aınalady", - dedi Baqyt Esimova.
Jastar saıasaty basqarmasynyń tapsyrysymen qolǵa alynǵan ıgi bastamany "Jas Star" qoǵamdyq birlestigi júzege asyryp otyr. Uıymdastyrýshylardyń aıtýynsha, búgingi shara Qostanaı oblysynyń aýmaǵynda bıyl Jeńistiń 75 jyldyǵyna oraı iske asyrylyp jatqan "Soǵys jańǵyryǵy" atty aýqymdy jobanyń bir tarmaǵy ǵana.
"Joba bastalǵaly beri kóptegen sharalar ótkizdik. Atap aıtar bolsaq, Qostanaı qalasy boıynsha Jeńistiń 75 jyldyǵyna arnalǵan kvest týr uıymdastyrdyq. Jastar men tarıhshylardy qatystyra otyryp, Jeńis saıabaǵyndaǵy "Dańq" memorıalynan bastap, oblys aýmaǵyndaǵy Keńes Odaǵynyń batyrlaryna qoıylǵan eskertkishterdi aralap, Otan soǵysynda erlikpen qaza tapqan jerlesterimizdiń erligin baıandaıtyn taǵylymdy dárister ótkizdik. Sonymen qatar, bıyl Jeńis kúni qarsańynda qalalyq qorymda jerlengen soǵys ardagerleriniń beıitterin qorshap, tazalap, aýdandar men qalalarda maıdangerlerge qoıylǵan eskertkishterdiń aınalasyn abattandyrdyq", - dedi "Jas Star" qoǵamdyq birlestiginiń tóraǵasy Abaı Dúısekov.
Jastar saıasaty basqarmasynyń basshysy Marat Jurqabaevtyń aıtýynsha, Otan soǵysynda iz-túzsiz ketken maıdangerlerdi izdestirýge uıtqy bolyp júrgen "Atamnyń amanaty" respýblıkalyq qory qolǵa alǵan izdeý sharalaryna Qostanaı oblysynyń jastary da belsendi at salysyp otyr.
Respýblıkalyq qor Qostanaı oblysynan soǵysqa attanyp, maıdanda joǵalyp ketken 5 adamnyń qujattaryn izdestirip, olardyń qaıda soǵysqany, qaıda jerlengeni týraly málimet tapqan. Sony bizge joldap otyr. Endi aldaǵy jetide sol aqparattardy maıdangerlerdiń týys-týǵandaryna tapsyraıyq dep otyrmyz. Munyń da bir úlken is-shara bolatynyn atap ótý kerek. Biz tek qana búgingideı aǵash otyrǵyzýmen ǵana shektelip qalǵan joqpyz. Bıyl A.Baıtursynuly atyndaǵy Qostanaı ýnıversıtetiniń tarıhshy-ǵalymdarymen birlesip, osy óńirden soǵysqa attanǵan maıdangerler týraly kóptegen derektik materıaldar jınaǵanbyz. Bul materıaldardyń jastarǵa beretin tálim-tárbıesi mol. Sondyqtan jyldyń sońyna deıin tyń derekterdi júıelep, jeke kitap etip shyǵarmaqpyz.
О́kinishke qaraı erikti jastar josparlaǵan biraz sharýa pandemııaǵa baılanysty júzege asyrylmaı qalǵan. Jyl basynda jastar saıasaty basqarmasynyń muryndyq bolýymen Qostanaıda jasaqtalǵan 151-atqyshtar dıvızııasynyń jaýyngerleri soǵysqan Reseıdiń burynǵy Stalıngrad qalasynyń mańyna, qazirgi Volgograd oblysyna arnaıy izdestirý tobyn jiberip, qazba júrgizip, jerlesterimiz qaza tapqan maıdan dalasyn zertteý jumystary josparlanǵan.
"Memleket basshysy Qasym-Jomart Toqaev byltyr Qostanaı oblysyna jumys saparymen kelgende Qazaqstan-Reseı erikti jastarynyń forýmyna qatysty. Sol forýmda Prezıdent 2020 jyldy Jastar jyly dep jarııalaǵany belgili. Biz sol is-shara barysynda Reseı Federasııasynan kelgen qoǵamdyq birlestiktermen birqatar memorandýmdarǵa qol qoıdyq. Sonyń ishinde osy izdestirý jasaǵyn qurý týraly jospar da bar edi. ókinishke oraı, bıyl shekara jabyq, shyǵa almaı qaldy. Reseılik eriktiler bizdi kútip otyr. olarmen habarlasyp, bul sharanyń keıinge qaldyrylatynyn jetkizdik", - dedi Abaı Dúısekov.
Qaıyń kóshetterin oblys ortalyǵynda ornalasqan birneshe JOO-ny men kolledj stýdentteri, sondaı-aq Qostanaı aýdanynan arnaıy kelgen belsendi jastar otyrǵyzdy. Bul jerdi saıaly baqqa aınaldyrý úshin áli de bolsa kóp eńbek etip, kóshetter qataryn kóbeıte túsý kerek. Al abattandyrý jumystary aıaqtalyp, jas qaıyń aǵashtary jaıqalyp óse bastaǵanda, jastar birlestikteri qala basshylyǵyna ásem Tobyl jaǵalaýyndaǵy jańa saıabaqqa Baýyrjan Momyshulynyń esimin berý týraly usynys jasaýdy uıǵaryp otyr.
Qostanaı oblysy