Mysyrdyń 74 jastaǵy turǵyny Ezzeldın Bahader álemdegi eń qart kásipqoı fýtbolshy atandy. Bul týraly halyqaralyq Reuters agenttigi habarlady.
Basylymnyń málimeti boıynsha, ol Gınnestiń rekordtar kitabyna rekordshy retinde ený úshin eki ret jasyl alańǵa shyqqan. 74 jastaǵy fýtbolshy óziniń alǵashqy kezdesýin naýryz aıynda ótkizgen. Tipti penaltı oryndap, qarsylastyń qaqpasyn dál kózdegen. Keıinnen ol pandemııa saldarynan ekinshi oıynyn ótkizý úshin jarty jyl kútýge májbúr boldy.
«6 qazan» atty klýbta óner kórsetetin Bahader jýyrda «Ál-Oıat» komandasymen ótken oıynda alańǵa shyqty. «Men munymen toqtap qalǵym kelmeıdi. Aldaǵy ýaqytta básekelestikti arttyrý úshin jeke rekordymdy taǵy bir márte jańalaý nıetim bar», deıdi ol.
Aıta keteıik, buǵan deıin jasy eń úlken fýtbolshynyń rekordy 73 jastaǵy ızraıldik Isaak Haııkke tıesili edi.