Keshe Premer-Mınıstr Serik Ahmetov «Teńizshevroıl» JShS bas dırektorynyń mindetin atqarýshy Bred Mıdltondy qabyldady. Kezdesý nátıjesinde Teńizshevroıldy keńeıtý keleshegi jobasy boıynsha ózara túsinistik týraly Memorandýmǵa qol qoıyldy.
Keshe Premer-Mınıstr Serik Ahmetov «Teńizshevroıl» JShS bas dırektorynyń mindetin atqarýshy Bred Mıdltondy qabyldady. Kezdesý nátıjesinde Teńizshevroıldy keńeıtý keleshegi jobasy boıynsha ózara túsinistik týraly Memorandýmǵa qol qoıyldy.
S.Ahmetovtiń aıtýynsha, bul Memorandým elimizde teńiz ken ornyn damytýǵa óte jaqsy serpin beredi. Eń mańyzdysy, jańa jumys oryndaryn qurýǵa, Qazaqstanda ındýstrııany, ónerkásipti jáne mashına jasaýdy damytýǵa múmkindik ashpaq.
Qabyldaý barysynda negizinen Qazaqstannyń «Teńizshevroıl» kompanııasymen yntymaqtastyǵy perspektıvalary talqylandy, sondaı-aq, TShO-nyń bolashaq keńeıtý jobasyn júzege asyrý máseleleri qaraldy.
Premer-Mınıstr S.Ahmetov óz kezeginde «Qazaqstan Úkimeti TShO-men tyǵyz yntymaqtastyqqa daıyn», dep atap ótti. Al B.Mıdlton Memorandýmnyń mańyzdylyǵyn aıtyp, memorandýmdy júzege asyrýǵa olar da ázir ekendigin jetkizdi.
Qazaqstan Úkimeti men «Teńizshevroıl» JShS arasyndaǵy Teńizshevroıl jaýapkershiligi shekteýli seriktestigin keńeıtý keleshegi jobasy jáne uńǵymanyń qysymyn basqarý jobasyn júzege asyrý arqyly Qazaqstanǵa ınvestısııalar tartýǵa, mamandardy oqytýǵa jáne daıarlaýǵa, sondaı-aq, jumyspen qamtýǵa járdemdesý maqsatyndaǵy yntymaqtastyq jaıly ózara túsinistik týraly Memorandýmǵa Munaı jáne gaz mınıstri Uzaqbaı Qarabalın jáne TShO bas dırektorynyń mindetin atqarýshy Bred Mıdlton qol qoıdy. Qujatqa qol qoıý rásiminen soń taraptar shaǵyn baspasóz máslıhatyna shyqty.
О́z kezeginde U.Qarabalın «teńizde óndiristik qýattylyq arttyrylyp, munaı shyǵarý jylyna 26 mln. tonnadan 38 mln. tonnaǵa deıin ósedi dep boljap otyrmyz. Bul Qazaqstan Respýblıkasy men seriktester úshin sáıkes ekonomıkalyq paıdamen aıtarlyqtaı ósý bolyp tabylady», dep atap ótti. Sonymen qatar, Memorandým qazaqstandyq mazmundy aıtarlyqtaı arttyrý boıynsha ózara kelisimdi qarastyratynyn aıtty.
«Atalǵan nysandy salý kezeńinde qosymsha 20 myń jańa jumys orny qurylady. Metall qurylymdaryn ázirleý boıynsha otandyq kásiporyndar úshin tapsyrystardy arttyrýǵa basa kóńil bólingen», dep túsindirdi ol. Budan ózge, Atyraýda salynyp jatqan munaı-hımııa keshenin shıkizattyń qajetti mólsherimen qolaıly baǵamen qamtamasyz etý týraly ýaǵdalastyqqa qol jetkizildi. 550 myń tonna propan, 380 myń tonna býtan óndirý jaıly sóz qozǵalýda, dedi.
Mınıstrdiń málimetinshe, Teńizshevroıldy keńeıtý keleshegi jobasy búginde eskızdik jobalaý satysynda, ony bekitý 2014 jyldyń basyna josparlanǵan.
Dınara BITIKOVA,
«Egemen Qazaqstan».