Azyq-túlik baǵasyna alańdaýǵa negiz joq. Keıbir taýar túrleri ishinara sál qymbattaǵanymen, negizgi azyq-túlik qoljetimdi. Baǵany turaqtandyrý qory da qaýyrt jumys istep, qapysyz qamdanýda.
Áleýmettik mańyzy bar azyq-túlik baǵasyn turaqtandyrý tetigi birshama jolǵa qoıylǵan. Qazir «Kókshe» áleýmettik-kásipkerlik korporasııasy arqyly turaqtandyrý qoryna azyq-túlik satyp alynýda. Búginde óńirdiń turaqtandyrý qorynda 1 600 tonnadan asa azyq-túlik bar. Byltyr osy maqsatqa oblystyq bıýdjetten 317,5 mln teńge bólinse, bıyl bul kórsetkish 750 mln teńgege jetip otyr.
Azyq-túlik baǵasyn baqylaý maqsatynda kúndelikti monıtorıng júrgiziledi. Baǵanyń turaqty bolýyna jergilikti jerde jıi ótkiziletin jármeńkeler de septigin tıgizýde. Máselen, jyl basynan beri aýyl sharýashylyǵy taýarlaryn óndirýshiler 200-ge jýyq jármeńke ótkizdi. Quny bazar baǵasynan áldeqaıda tómen azyq-túliktiń satylýy qarapaıym halyq úshin jaqsy bolyp tur. Erteńin erte oılaıtyn el úshin qysqa qamdanýdyń tıimdi joly da osy. Aıtpaqshy, osy jármeńkelerde 440 mln teńgeniń ónimi satyldy.
– Baǵany turaqtandyrýdyń taǵy bir tetigi júzege asyrylýda. Kásipkerlik sýbektisine belgili bir kezeńde baǵany turaqty ustap turý mindettemesi júktelgen. Nesıe berý bul baǵyttaǵy jumystyń júıeli bolýyna ıgi áserin tıgizedi. Sonymen qatar aýdan ákimdikterimen, jekelegen kásiporyndarmen birlese otyryp byltyrdan beri osy baǵytta júıeli jumys júrgizip kelemiz. Aıtalyq, nan óndirýshi «Aqsaı nan-Kókshetaý» nan kombınaty seriktestigimen jasalǵan ýaǵdalastyq bar. Seriktestik 300-den asa saýda núktesinde halyq kóp tutynatyn nan túrin 75 teńgeden satýda. Mine, osyndaı jumystardy barlyq aýdanda qolǵa alyp jatyrmyz, – deıdi oblystyq kásipkerlik jáne ónerkásip basqarmasy basshysynyń orynbasary Jasulan Ábdirahmanov.
Baǵany turaqtandyrýǵa qatysty kásiporyndarmen 1 myńnan asa memorandým jasalǵan. О́ńirdegi baǵanyń turaqtylyǵyna osy kelisim oń yqpal etýde.
Jyl basynan beri birinshi surypty un, qant, qaraqumyq jarmasy, kartop, sıyr eti, tuz, sary maı tárizdi taýarlardyń baǵasy birshama kóterildi. Onyń basty sebebi joǵaryda atalǵan keıbir ónimderdiń bizdiń óńirde óndirilmeýinen. Degenmen astyqty ólkede un, kartop, sıyr eti, sary maı baǵasyn turaqty ustap turýǵa ábden bolar edi. Sońǵy ýaqytta qus tumaýyna baılanysty jumyrtqanyń baǵasy da sál-pál kóterilip keledi.
Kóńil demder bir jaıt, áleýmettik mańyzy bar azyq-túlik taýarlarynyń baǵasyn udaıy qatań baqylaýda ustaǵandyqtan saýdagerlerdiń tábeti onshalyqty ósip turǵan joq. Áleýmettik mańyzy bar azyq-túlik baǵalaryn turaqtandyrý tetikterin iske asyrýdy qamtamasyz etý jónindegi komıssııanyń usynysy boıynsha «Kókshe» áleýmettik-kásipkerlik korporasııasy 2 293 tonna azyq-túlik ónimin satyp alǵan. Demek el yrysy kemimeıdi degen sóz.
Aqmola oblysy