Memleket basshysy Qasym-Jomart Toqaev eldegi sýdıalardy irikteý máselesine qatysty pikir bildirdi, dep habarlaıdy Egemen.kz.
"Kásibı sýdıalar korpýsy - barlyq sot reformalarynyń sheshýshi faktory. Sońǵy jyldary sýdıalyqqa úmitkerlerge qoıylatyn talaptar artyp, irikteýdiń zamanaýı quraldary engizildi. Myqty zańgerler, kórnekti ǵalymdar jáne praktık-zańgerler endi sýdıalyq jumys tájirıbesi joq sýdıa bola alady. Meniń oıymsha, bul jerde Qazaqstan Joǵarǵy Sotynyń Tóraǵasy Jaqyp Asanov úlken ról atqardy", - dedi Qasym-Jomart Toqaev sýdıalardyń VIII sezinde.
Prezıdenttiń pikirinshe, sotqa ekonomıka jáne quqyq salalarynyń kúrdeli máselelerin erkin túsinetin mamandardy tartý kerek.
"Bul ýaqyt talaby, men bul týraly Joldaýda aıttym. Sýdıalardyń abyroıy minsiz, al kandıdattardy irikteý prosesi ashyq ári jarııa bolýǵa tıis. Kóptegen damyǵan elderde sýdıalarǵa qoıylatyn talaptar óte joǵary, tipti, bolmashy teris qylyqtyń ózi onyń qyzmetten bas tartýyna sebep bolýy múmkin. Mundaı tájirıbe Qazaqstanda da qoldanylýy tıis dep esepteımin. Sýdıalardy irikteý jáne daıarlaý jónindegi mindetterdi oryndaý sýdıa kadrlarynyń sapasyna jaýap beretin Joǵary Sot Keńesine júktelgen. Bul óte mańyzdy jumys, ony sapaly oryndaý kerek", - dep atap ótti Memleket basshysy.
Eske sala keteıik, onlaın rejımde Qazaqstan Respýblıkasy sýdıalarynyń VIII sezi ótip jatyr. Sezd jumysyna Memleket basshysy Qasym-Jomart Toqaev qatysýda.