Qostanaıdaǵy joǵary medısına kolledjiniń oqytýshylary jergilikti volonterlerge alǵashqy medısınalyq kómek kórsetýdiń qyr-syryn úırete bastady. Úsh kúndik kýrs barysynda otyzdan astam erikti qan toqtatý, jarany baılaý, synǵan aıaq-qoldy tańý, aýyz nemese muryn qýysyna dem jiberý, júrek tusyna massaj jasaý, apatqa túsken adamdy tezirek emdeý mekemesine jetkizý nemese jedel medısınalyq kómek shaqyrý daǵdylaryn meńgeredi.
Qysqa merzimdik medısınalyq kýrstan ótip jatqan «Regıon-10» volonter jasaǵy biraz jyldan beri iz-túzsiz ketkenderdi izdestirý, qutqarý sharalaryna belsendi atsalysyp keledi. Jasaqtyń oblys aýmaǵynda birneshe fılıaly jumys isteıdi. Nur-Sultan, Qyzylorda volonterlerimen de tyǵyz baılanys ornatqan.
– Bizdiń jumysymyz iz-túzsiz joǵalyp ketken adamdardy izdeýge, qıyn jaǵdaıǵa túsken jandardy qutqarýǵa baǵyttalǵan. Jumys barysynda ártúrli tosyn oqıǵalarǵa tap bolyp jatamyz. Keıbir sátterde alǵashqy medısınalyq kómet kórsetýge týra keledi. Adam qysylyp jatqanda tosylyp qalýǵa bolmaıdy, qas-qaǵym sát qymbat. Mundaı kezde az da bolsa medısınalyq bilim kerek. Oılasa kele, oblystyq densaýlyq saqtaý basqarmasyna habarlasyp, biz úshin medısınalyq saýat ashý kýrstaryn uıymdastyrý múmkindigin qarastyrýdy ótindik. О́tinishimiz birden qoldaý taýyp, Qostanaıdaǵy joǵary medısınalyq kolledjinde kýrstan ótýge múmkindik aldyq, – deıdi «Regıon-10» volonterler jasaǵynyń nusqaýshysy Vladımır Shaýfler.
Densaýlyq saqtaý basqarmasynyń usynysyn medısınalyq kolledj ujymy da qoldapty. Oqý orny volonterler úshin on eki saǵattyq tájirıbelik kýrs uıymdastyrǵan. Pandemııaǵa baılanysty eriktilerdi shaǵyn toptarǵa bólip oqytý josparlanypty. Kolledj oqytýshylary alǵashqy kúni ashyq jáne jabyq jaraqattardy tańýdy, sondaı-aq ókpe-júrek reanımasııasynyń ádisterin úıretti. Oqytýshylar alǵashqy medısınalyq kómek kórsetý barysynda mundaı qarapaıym ádis-tásilderdi bilýdiń mańyzy zor deıdi.
Qostanaı oblysy