Almatydaǵy Ulttyq kitaphana qabyrǵasynda «Altyn qalam – 2020» ádebı júldesiniń qorytyndysy jarııalanyp, jeńimpazdardyń esimderi tanystyryldy. Dástúrli ádebı baıqaýǵa bıyl Qazaqstan, Reseı, Ýkraına, AQSh, Izraıl, Belarýs elderinen, sonymen qatar tuńǵysh ret Mońǵolııa jáne Ortalyq Afrıka respýblıkasynan barlyǵy 408 avtor qatysty.
«Altyn qalam» ádebı júldesiniń jeńimpazdaryn marapattaý sharasy bıyl alǵash ret jabyq esik jaǵdaıynda uıymdastyrylyp, saltanatty jıynǵa tek jeńimpazdar men joba seriktesteri jáne jýrnalıster shaqyryldy. Naýryz aıynyń 15-nen qyrkúıektiń 15-ne deıin qabyldanǵan 600-ge jýyq shyǵarma baıqaýdyń akalam.kz resmı saıtynda jarııalanyp, oqyrmandar men qazylardyń saraptaýynan ótken. 19 qazanda jarııalanǵan baıqaýdyń qysqa tizimine ár janr boıynsha jeti shyǵarmadan engizilgen edi. Qazylar sheshimimen solardyń ishindegi eń úzdik bir shyǵarma ǵana marapattaldy.
Belgili jazýshy Tólen Ábdik «Qazaq ádebıetine qosqan eleýli eńbegi úshin» marapatqa ıe boldy. Al Baýyrjan Ospanov taǵaıyndaǵan Esenqul Mamanov atyndaǵy bas júlde –
1 mln teńgeni almatylyq Zaman Tóleýov jeńip aldy. Jazýshynyń «Qaraqýys» romany «Úzdik qazaq romany» atalymy boıynsha jeńimpaz dep tanyldy.
Taǵy bir basty syılyq –
1 000 000 teńgeni balalar shyǵarmashylyǵyna arnalǵan «Daraboz» baıqaýynda ózgeden oza shapqan pavlodarlyq qalamger Alpysbaı Honj ıelendi.
– Bıylǵy báıgede baq synaǵandar qatary byltyrǵydan ósken jáne olardyń arasynda tanymal avtorlar, qalalyq, oblystyq, respýblıkalyq jáne halyqaralyq baıqaýlardan júlde alǵan kásibı deńgeıi joǵary qalamgerler kóp boldy. Bir atap óterligi, bıyl akalam.kz saıtyna kirip, baıqaýǵa usynylǵan shyǵarmalarmen tanysyp, pikir bildirgender qarasy qalyń. Sońǵy tórt kúnde 1 mln-nan asa adam konkýrstyń resmı saıtyn ashyp oqyǵan, – deıdi «Altyn qalam» ádebı júldesin uıymdastyrý komıtetiniń dırektory Kenje Jumanuly.
Aıtýly baıqaýdyń túrli atalymynda úzdik dep tanylǵan avtorlar tómendegideı. «Jyldyń úzdik poezııasy» Makınara Haırýmǵa, «Jyldyń úzdik prozasy» Ertaı Aıǵalıulyna, «Jyldyń úzdik satırasy» Alpysbaı Honjǵa, «Jyldyń úzdik kınossenarııi jáne dramatýrgııasy» Qýandyq Túmenbaıǵa, «Jyldyń úzdik fantastıkasy jáne detektıv shyǵarmasy» Saılaý Tóleýovke, «Daraboz» balalarǵa arnalǵan úzdik shyǵarma Alpysbaı Honjǵa, «Úzdik qazaq romany» Zaman Tóleýovke buıyrdy.
«Altyn qalam» ádebı júldesi 2009 jyldan beri ótkizilip keledi. Baıqaýdyń ereksheligi sol – joba uıymdastyrýshylarynyń ádebıetke qatysy joq, tek kitap oqyǵandy unatatyn oqyrmandar. Alǵashqy kezeńde shyǵarmalar akalam.kz veb-saıtynda irikteldi. Onlaın daýys berý 6 aı boıy jalǵasqan bolatyn.
ALMATY