Aýa raıy kúrt qubylyp, qara jerge qatqaq turyp, qar basyp qalǵanyna qaramastan Qostanaıda abattandyrý jumystary tolastamaıdy. Ashyq demalys oryndaryndaǵy bos jerlerge jasyl jelek ásem shyrshalar otyrǵyzyldy. Jóndeýden jańa ótken kóshelerdiń jaǵalaýyndaǵy kári aǵashtar kesilip, ornyn jas kóshetter basýda.
Bıyl jaz boıy jóndeý jumystary júrgizilgen Ál-Farabı, Chkalov, Arystanbekov kósheleriniń boıyna úıeńki men terek kóshetteri otyrǵyzylyp jatyr. Bul kóshelerde burynnan ósip turǵan kári aǵash baltaǵa jyǵylsa, onyń ornyna 10 kóshet otyrǵyzylady.
– Chkalov kóshesin qaıta jóndeýden ótkizdik. Joba boıynsha bul kósheniń boıyna 200 aǵash otyrǵyzylý kerek. Bul jerdegi jumys aıaqtalǵan soń, saıabaqtardyń bos alańqaılaryn kóshetpen tolyqtyramyz, – dedi jolaýshylar kóligi jáne avtomobıl joldary basqarmasynyń mamany Nuraly Esirkepov.
Munyń syrtynda, eki aptadan beri oblys ortalyǵyndaǵy Gashek kóshesi men trıatlon saıabaǵynda, sondaı-aq jastar saraıynyń aınalasyna jetijyldyq shyrshalar boı tikteı bastady. Tamyryn japqan topyraǵymen birge Aqmola oblysynan ákelingen myńnan astam shyrsha qalanyń birneshe jerine otyrǵyzylady. Mamandardyń aıtýynsha, qazir adam boıyndaı bolyp qalǵan jasyl shyrshalar keıin 5 metrge deıin kóteriledi eken.
Aǵash kóshetteri arnaıy jaldanǵan merdigerlerdiń kúshimen otyrǵyzylyp jatyr. Qala ákimdiginiń málimetinshe, oblys ortalyǵynda jyl sońyna deıin 3 myńnan astam jasyl jelek otyrǵyzylady.
Qostanaı oblysy