Rýdnyı qalasynyń ýchaskelik ınspektory Aıdos Qulymbetov kóshede densaýlyǵy kúrt nasharlap, qulap qalǵan qala turǵynyna alǵashqy medısınalyq kómek kórsetip, ajaldan arashalap qaldy.
Aman qalǵan azamattyń jubaıy Svetlana Komıssarova polısııa qyzmetkerine alǵys bildirdi.
– Ekeýmiz tańerteń áldebir sharýalarmen kóshege shyqtyq. Pıonerskıı jáne Dzerjınskıı kósheleriniń qıylysynda kúıeýim qatty aýyryp, esinen tanyp qaldy. Qatty qoryqqanym sonshalyq, shoshynyp, ne isterimdi bilmeı abdyrap qaldym. Qolymnan bar kelgeni, aınaladaǵy adamdardy kómekke shaqyrý ǵana boldy, – dep eske alady sol kúngi oqıǵany S.Komıssarva.
Dál osy sátte olardyń janynan óz kóligimen ýchaskelik polısııa qyzmetkeri ótip bara jatqan. Ol jerde jatqan kisini kóre sala kómekke jetip kelip, naýqasqa alǵashqy medısınalyq kómek kórsetipti. Sodan keıin tártip saqshysy erli-zaıyptyny kóligine otyrǵyzyp, aýrýhanaǵa aparǵan.
– Qazir kúıeýimniń ómirine qaýip tónip turǵan joq. Biraq dárigerler «Eger polıseı der kezinde kómek kórsetpegende, munyń arty orny tolmas qaıǵyǵa ulasýy ábden múmkin edi», dedi. Qyzmettik boryshyn atqaryp júrmese de, joldan burylyp kelip, kúıeýimniń ómirin qutqaryp qalǵan tártip saqshysyna zor alǵys aıtamyn, – deıdi bir ólimnen qalǵan azamattyń zaıyby.
Polısııa sapynda bes jyldan beri boryshyn ótep kele jatqan Aıdos buǵan deıin de birneshe adamdy qutqarǵan eken. 2018 jyly qyp-qyzyl ottyń ortasynan adamdardy aman alyp shyqqan ýchaske ınspektory Ishki ister mınıstriniń qolynan «Erligi úshin» medalin alypty.
– Kúndelikti jumysymyz osy ǵoı. Esinen tanyp jatqan adam kózin ashqanda ózim de qýanyp kettim, – deıdi tártip saqshysy.
Qostanaı oblysy