Qostanaı oblysyna jumys saparymen kelgen Sybaılas jemqorlyqqa qarsy kúres agenttiginiń tóraǵasy Alık Shpekbaev memlekettik qyzmetshilermen kezdesý barysynda osylaı dedi.
Agenttik tóraǵasy Rýdnyı qalasynda bolyp, qoǵamdyq uıymdardyń ókilderimen jáne memlekettik qyzmetshilermen kezdesti. A.Shpekbaev jıyn barysynda sybaılas jemqorlyqqa qarsy zańǵa engizilgen sońǵy ózgerister týraly sóz qozǵap, korrýpsııanyń aldyn alý jáne eskertý baǵytynda el kóleminde júzege asyrylyp jatqan jumystar jaıynda jan-jaqty baıandady.
Agenttik tóraǵasy qaramaǵyndaǵy laýazym ıesiniń jemqorlyq áreketine basshylardyń tikeleı jaýap beretinin taǵy bir eskertip, azamattarmen ashyq dıalog qurýdy qalyptastyrýdyń mańyzyna toqtaldy. Bul jerde bıyl qyrkúıek aıynda Qashar kentiniń ákimi jasaǵan jemqorlyq qylmys úshin Rýdnyı qalasynyń ákimi qyzmetinen ketkenin aıta ketken jón.
Jergilikti atqarýshy organdardyń azamattarǵa qolaıly jaǵdaı týǵyzyp, jemqorlyq táýekelderin joıý maqsatyndaǵy jumystardy kúsheıtý qajet ekenin qadap aıtqan A.Shpekbaev: «Búgingi jemqorlyqqa qarsy zańnamalar árbir basshyǵa joǵary talap mindettep otyr. Sizder memlekettik organdardyń jumysy ár basshy qyzmet barysynda adaldyq pen tazalyqqa umtylǵanda ǵana nátıjeli bolatynyn esten shyǵarmaýlaryńyz kerek. Sondyqtan basshylar jemqorlyqqa qolaıly ahýal týdyratyn kez kelgen jaǵdaıdy túbegeıli joıý sharalaryn belsendi júrgizýi tıis. Búginde buǵan qarsy kúres quraldary jetkilikti, tek shynaıy umtylys qajet», dedi.
Qostanaı oblysy