Almatydaǵy Qazaq ulttyq qyzdar pedagogıkalyq ýnıversıtetiniń "Tomiris" bı ansambli Ispanııada ótken "Online Wave" halyqaralyq bı festıvaliniń jeńimpazy atandy, dep habarlaıdy Egemen.kz
Jahandyq jarystyń ótýine "Fiestalonia Milenio" eýropalyq uıymy uıytqy boldy. Talantty jastardy anyqtaý, olardy bekzat ónerge baýlý arqyly shyǵarmashylyq qarym-qabiletin damytýdy kózdegen óner saıysyna álemdegi joǵary oqý oryndary janyndaǵy ansamblder men jeke shyǵarmashylyq ujymdar qatysyp, birneshe nomınasııa boıynsha baqtaryn synady.
"Tomiris" toby eki kezeńnen turatyn festıvaldiń alǵashqy aınalymynda "Sylqyldaq" ulttyq bıin oryndasa, ekinshi týrda ansambl múshesi Darııa Muhıtovanyń oryndaýyndaǵy "Orteke" bıin kórermen nazaryna usyndy.
Eki horeografııalyq kompozısııanyń jalpy uzaqtyǵy – 5 mınýt. Saıysqa álemdik deńgeıde tanymal óner maıtalmandary qazylyq jasady.
Konkýrs barysynda óner ujymdary kásibı jáne ártistik oryndaýshylyq sheberligi, sahnalyq mádenıeti, bı kompozısııasynyń ózindik ereksheligi men shyǵarmanyń kórkemdik qundylyǵy boıynsha baǵalandy. Sonymen qatar mýzykalyq materıaldardyń sáıkestigi, bıdiń ulttyq negizderiniń shynaıylyǵy jáne ulttyq stıldiń úılesimdiligi de nazarǵa alyndy.
– "Qazaq bı óneriniń hanshaıymy" atanǵan Shara Jıenqulovanyń búgingi izbasarlary Qyzdar ýnıversıtetiniń "Tomiris" ansambli jarys barysynda óz sheberlikterin tolyqtaı pash etip, jeńis tuǵyrynan kórindi. Bul – óz ónerleri arqyly bıdiń ómirindegi alar oryny men áserin sheber kórsete bilgen boıjetkenderdiń eńbeginiń aıqyn nátıjesi, – deıdi ansambldiń kórkemdik jetekshisi Medet Aǵabylov.
Baıqaý qorytyndysy boıynsha Darııa Muhıtovanyń óneri qazylar alqasy tarapynan joǵary baǵalanyp, birinshi orynǵa laıyq dep tanyldy. Ol "Fiestalonia Milenio" eýropalyq uıymynyń arnaıy dıplomymen marapattaldy.
Aıta keteıik, "Online Wave" halyqaralyq shyǵarmashylyq baıqaýy 16 jyldan beri uıymdastyrylyp keledi. Bıylǵy saıysqa álemniń 37 elinen 500-den astam ónerpaz qatysty.