Qostanaı oblysynyń polısııa departamentinde aımaqta turyp jatqan azamattardyń quqyqtyq mártebesin retteý máselesine arnalǵan dóńgelek ústel otyrysy ótti. Jıynǵa Adam quqyqtary jáne zań tártibin saqtaý jónindegi halyqaralyq bıýro fılıalynyń dırektory Mahabbat Ahmetbekova, jergilikti polısııa qyzmeti basqarmasy bastyǵynyń orynbasary Jeńis Bısembaev, sondaı-aq kóshi-qon qyzmeti basqarmasynyń bastyǵy Qaırat Dútpaev bastaǵan kóshi-qon qyzmetiniń ókilderi qatysty.
Jıynda oblys aýmaǵynda turyp jatqan azamattyǵy joq, sondaı-aq óziniń shet memlekettiń azamaty ekenin dáleldeı almaıtyn adamdardyń quqyqtyq mártebesin aıqyndaý jóninde másele kóterilip, mundaı azamattardyń mártebesin retteý jónindegi birlesken jumysty odan ári jandandyrýdyń tetikteri men joldary talqylandy.
Mahabbat Ahmetbekovanyń aıtýynsha, bıyl bıýro men polısııa organdarynyń birlesken jumystarynyń nátıjesinde Qostanaı oblysynda 36 adam Qazaqstan Respýblıkasy azamattyǵyn jáne azamattyǵy joq ekenin dáleldeıtin kýálikter men shetel azamattyǵyn aıǵaqtaıtyn qujat alǵan.
Jalpy jyl basynan beri Adam quqyqtary jónindegi bıýronyń Qostanaı fılıaly men ishki ister organdaryna 100-ge jýyq adam júginipti.
Oblystyq kóshi-qon basqarmasynyń bastyǵy Qaırat Dútpaevtyń aıtýynsha, bul baǵyttaǵy jumystar kúndelikti atqaryla beredi.
– Kóshi-qon qyzmeti men jergilikti polısııa qyzmetiniń qyzmetkerleri oblysta turatyn adamdardy azamattyń jeke basyn kýálandyratyn qujatsyz anyqtaý jáne olarǵa mártebe beretin qujat resimdeý maqsatyndaǵy birlesken jumystardy jandandyra túsedi, – dedi Q.Dútpaev.
Jıynda azamattardyń qujattaryn resimdeý barysynda týyndaıtyn kedergiler men ózekti máseleler talqylanyp, aldaǵy mindetter aıqyndaldy.
Qostanaı oblysy