Lısakov qalasynda turatyn Alekseı Sychýgovtyń esimi búginde bútin Qostanaı óńirine belgili. Týabitti dert dendep ajal aýzynda jatqan úsh jasar beıtanys balaǵa baýyr etin bólip berip, ólimnen arashalap qalǵan jas jigittiń erligine byltyr búkil el súısinip, eriksiz tańǵalysqan.
Aıtpaqshy, naýqas sábıdiń de esimi Alekseı bolyp shyqty. О́tsiz týylǵan shaqalaqtyń baýyry irı bastaǵan soń «Alaqandaǵy ómir» jobasy arqyly astanada Túrkııadan kelgen dárigerler kúrdeli ota jasap, balanyń baýyryn aýystyrǵan. Ol joly ákesi donor bolǵan. Osy otadan keıin de ata-anasy balany birneshe ret Túrkııaǵa aparyp keldi. Bilikti mamandar qalt etpeı baqylaý júrgizip, jańa baýyrdyń bitip ketýine qansha kúsh salǵanymen bolmady. Jeti aıdan soń taǵy balanyń baýyry asqynyp, ákesi ekinshi qaıtara donor bola almaǵan soń byltyr basqa adam izdeýge týra keledi. Balanyń baǵyna oraı, birden birneshe donor tabyla ketti. Dárigerler olardyń bárin muqııat medısınalyq tekserýden ótkizip, ishinen Alekseı Sychýgovty tańdap aldy. Kóp keshikpeı qos Alekseı operasııa tósegine jatty. Abyroı bolǵanda, ota sátti ótip, jańa baýyr jańa ornyna jyldam beıimdelip, jandana bastady.
– Birde keshkilik áleýmettik jelide kishkentaı balasyna donor izdep alasurǵan ananyń janaıqaıyn kórip qaldym. О́miri kórmesem de, sábıdiń beınesi kóz aldyma kólbeńdep turyp aldy. Ertesi uıqydan tura salyp, oılanbastan habarlamada kórsetilgen telefonǵa qońyraý shaldym. Odan keıin dárigerlerge sansyz analız tapsyryp, tekserýlerden óttim. Aqyry baýyrym aýystyrýǵa jaraıdy degen qorytyndy shyqty. Odan keıin dárigerler otadan keıin birden ólip ketýim múmkin ekenin eskertip, bastapqy oıymnan bas tartýǵa áli de kesh emes ekenin eskertti. Men oılanatyn túgi joq ekenin aıtyp, dáriger pyshaǵy qandaı jaǵdaıǵa dýshar etse de, eshkimge kiná artpaıtynym týraly qujat toltyryp, qol qoıyp berdim. Ota Ankarada óte sátti ótti. Sodan beri eki jylǵa taıaý ýaqyt ótti, ózimdi óte jaqsy sezinemin, – dedi A.Sychýgov.
Alaıda Alekseı otadan keıin birden aıaqqa turyp kete alǵan joq. Dárigerler baýyrynyń úshten birin, ótin, aıaq tamyrynyń bir bóligin alyp tastady. Qazir densaýlyǵy tolyq qalpyna kelgenimen, aýyr kóterýge áli erterek. Otadan keıin jas jigit talaı tańdy uıqysyz atyryp, kóp kúnderin azappen ótkizgenin jasyrmaıdy.
– Ishimde birdeme jarylyp ketken sııaqty aýrýdan basqa eshteńe sezbedim. Ne uıyqtaı almaısyń, ne tura almaısyń, tósekke tańylyp jatyp ishki aǵzańnyń qatty aýyrǵanyn seziný óte aýyr eken. Tek ish qurylysymnyń aýyrǵany basylyp, alańsyz uıqyǵa ketýdi armandadym. Ádette, otadan keıin alǵashqy úsh kún boıy dárigerler donorlarǵa morfın salady eken. Meniń allergııam bar bolǵandyqtan, ony da salmady. Qazir bári umytyldy ǵoı, – dep jymıdy Alekseı.
Byltyr Tuńǵysh Prezıdent kúni qarsańynda aımaq basshysy Arhımed Muhambetov «Qostanaı oblysynyń Altyn kitabyna» engen 11 jas órendi marapattady. Sport, óner, ǵylym, bıznes salasynda tolaıym tabysqa qol jetkizgen kileń dúldúlder. Jeńis tuǵyrynda Lısakov qalasyndaǵy ken ornynda mashınıst kómekshisi bolyp jumys isteıtin Alekseı Sychýgov ta júıriktermen ıyq teńestirip turdy.
Qazir eki Alekseı bir týǵandaı bolyp baýyr bolyp ketti. Ekeýi jıi kezdesip turady. Úlkeni biraz kórinbeı ketse, kishisi elegizip izdeı bastaıdy. Týǵaly solaqaı kishkentaı Alekseı otadan keıin, asty oń qolymen jeı bastaǵan. Ata-anasy muny úlken Alekseıdiń baýyry áser etti dep yrymdaıdy eken.
Bir sábıdiń ómirine arasha túsip, kópshiliktiń alǵysyn alǵan A.Sychýgov óz isin erlik dep sanamaıdy.
– Adamǵa qolushyn sozý adamǵa tán qasıet qoı, bul erlik emes. Jaqsylyq jasasań janyń semiredi. Baýyrymnyń bir bólshegin berip, ózime ómirlik baýyr taptym, – deıdi beıbit kúnniń batyry.
Qostanaı oblysy