Qostanaıǵa qashyqtan oqyp jatqan oqýshylarǵa arnalǵan 3 myń kompıýter jetkizildi. Oqý qurylǵylary daryndy balalarǵa arnalǵan «Bilim-ınnovasııa» lıseı-ınternaty ǵımaratyna túsirilip, BAQ ókilderiniń kózinshe tekserilip, túgendelip, qabyldanyp alyndy.
– Bıyl qashyqtan oqytýdyń sapasyn qamtamasyz etý maqsatynda Úkimet qorynan 2,4 mlrd teńge bólinip, 15 222 kompıýter qurylǵysy satyp alynǵan edi. Onyń ishinde 1584 kompıýter, 11586 noýtbýk, 2050 planshet bar. Buǵan deıin kelgen kompıýterlerdiń barlyǵy 20 aýdandaǵy mektepterge taratyldy. Búgin 2 myń 982 noýtbýk qabyldap alyp otyrmyz. Qazir mamandar ár noýtbýkty qosyp kórip, tehnıkalyq sáıkestigin tekserip jatyr. Qarasha aıynyń sońyna deıin qalǵan 6 myń 856 noýtbýk jetkiziledi, – dedi oblystyq bilim basqarmasyna qarasty aqparattandyrý jáne bilim sapasy ortalyǵynyń dırektory Olga Kozlıýk.
Oqý jyly bastalǵaly bilim basqarmasy oblys oqýshylaryna 12 myń 500 kompıýter bergen. Al jańadan qabyldanyp alynǵan kompıýterlik qurylǵylar ár aýdanǵa jiberilip, epıdemııalyq jaǵdaı ýshyǵyp bara jatsa, qashyqtan oqýǵa jiberilgen balalarǵa beriledi. Birinshi toqsanda oblys boıynsha 22 myńnan astam bala synypta bilim aldy, bul balalardyń deni aýyl mektepterinde oqıdy.
Ortalyq dırektorynyń aıtýynsha, kelip jatqan kompıýterlerdiń ishinde aqaýy bar qurylǵylar da kezdesip qalady. Mundaı jaǵdaıda zaýyt ókili jaramsyz kompıýterdi qaıtyp alyp, ornyna basqa kompıýter jetkizip beredi.
– Qazir qashyqtan bilim alyp jatqan balalardyń kóbi óz úıindegi kompıýter, noýtbýk, planshetterin paıdalanady. Bizge kelgen kompıýterler kóbine kompıýterlik qurylǵy satyp alýǵa múmkindigi joq muqtaj balalarǵa berilip jatyr. Mektep pen ata-ananyń arasynda kelisimshart jasalady da, ata-ana mektep dúnıesiniń bútindigine jaýaptymyn dep qol qoıyp beredi. Úıde sabaqqa paıdalanyp, keıin jaǵdaı túzelgen soń, kompıýterdi mektepke qaıtaryp beredi, – dedi aqparattandyrý jáne bilim sapasy ortalyǵy dırektorynyń orynbasary Meıramǵalı Taıpov.
Lıseı-ınternat ǵımaratyna túsirilgen 3 myńǵa jýyq qurylǵyny jıyrma shaqty baǵdarlamashy maman tekserýden ótkizip, tirkeýge qoıyp jatty. Kompıýterlerdi Qostanaıǵa jetkizip bergen zaýyt ókili de osynda. Mamandar qandaı da bir aqaý tapqan kompıýterdi birden qaıtaryp alyp, bir aptanyń ishinde onyń ornyna basqasyn ákelip tapsyrady. Baǵdarlamashylardyń aıtýynsha, eshbir tehnıkalyq qurylǵydan aqaý tabylmaǵan.
– Ár noýtbýktyń tehnıkalyq erekshelikterin tekserip, qashyqtan oqý barysynda qajet paıdalanylatyn baǵdarlamalardyń bar-joǵyn qaraımyz. Vındoýsy durys ashylyp, durys jumys isteı me, qurylǵynyń pasporty boıynsha sáıkes kele me, sonyń bárin muqııat qarap shyǵyp, durys bolmasa, qaıtaryp beremiz. Oqýshylar «Zoom» qosymshasy arqyly oqyǵan kezde Veb-kamera jumys istep turý kerek. Dybysyna deıin tekserip jatyrmyz, eki dınamık te jumys istep turýy kerek. Búginshe 100 shaqty noýtbýkty tekserip shyqtym, aqaýy bar tehnıka kezdespedi, bári jaqsy, sapaly qurylǵylar, – deıdi ınjener-tehnık Shyńǵys Kenjebekov.
Jańa kompıýterlerdiń otandyq kásiporynda jasalǵanyn aıta ketý kerek. Petropavl qalasyndaǵy kompıýter zaýyty mektepterdi kompıýtermen qamtý baǵdarlamasy aıasynda qashyqtan oqıtyn oqýshylardy kompıýter qurylǵylarymen tolyq qamtamasyz etýdi óz mindetine alǵan. Zaýyt shyǵaryp jatqan ónimge qajet bólshektiń 30 paıyzy Qazaqstanda jasalǵan.
Qostanaı oblysy