Beıimbet Maılın aýdanynda aýyl turǵynyn aldap, aqshasyn alyp ketken alaıaqtardyń áreketi beınekameranyń kómegimen áshkere boldy. Aýdandyq polısııa bóliminiń qyzmetkerleri qarjylyq alaıaqtyq qylmysty izin sýytpaı ashyp otyr.
Tergeý bóliminiń qyzmetkeri Álisher Baıqanovtyń aıtýynsha, polısııa bólimine 3-qarasha kúni shaǵym túsirgen Nıkolaev aýylynyń turǵyny eki belgisiz áıeldi jaýapqa tartýdy ótinedi. Beıtanys áıelder túrli taýarlar satyp alýdy usynyp, er adamnyń úıine kirgen. Áńgime barysynda alaıaqtar jábirlenýshiden bútin 10 myń teńgeni usaq aqshaǵa aıyrbastap berýin surap, qoldaryna aqsha tıgen soń taıyp turǵan. Er adam biraz ýaqyttan keıin ǵana qolyndaǵynyń jalǵan aqsha ekenin biledi.
Abyroı bolǵanda, qaskúnemderdiń jeke basyn anyqtaýǵa jábirlenýshiniń qyraǵy kórshileriniń kómegi tıgen. Olar oqıǵa bolǵan ýaqyt shamasynda jábirlenýshiniń esik aldynda reseılik nómirli kólikti kórgenderin aıtady. Osyǵan uqsas avtokólik buǵan deıin patrýldik polısııa qyzmetkerlerine de kezikken. Olar sol kúni shetel kóligin qujat tekserý maqsatynda toqtatqan. Eldi mekenderde ornalasqan beınebaqylaý kameralary arqyly polıseıler bul kóliktiń aldymen aýdan ortalyǵyna, sodan keıin Tobyl kentine barǵanyn anyqtady.
Osylaısha, qysqa merzimde sur tústi avtomobıldiń qozǵalysy men turǵan jeri tolyq anyqtalady. Kólik ishinde otyrǵandar jábirlenýshi sıpattaǵan áıelder bolyp shyqty.
- Qylmystyq is QR QK-niń 190-babynyń 2-bólimi boıynsha tirkeldi. Qazir sotqa deıingi tergeý aıaqtalyp, materıaldar sot qaraýyna jiberildi, - dedi tergeýshi Álisher Baıqanov.
Qostanaı oblysy