Qostanaı oblystyq polısııa departamentinde ótken jıynda aımaqtaǵy tergeý qyzmetiniń 10 aılyq jumysy qorytyndylanyp, jalpy ishki ister organdary qyzmetin sıfrlandyrý máselesi qaraldy.
Basqosý barysynda departament bastyǵy Beket Aımaǵambetov taıaýda Memleket basshysy Qasym-Jomart Toqaevtyń tóraǵalyǵymen ótken IIM-niń keńeıtilgen alqa otyrysynda tártip saqshylaryna júktelgen jańa mindetter týraly sóz etti.
– Ishki ister organdarynda júzege asyrylyp jatqan reformalyq ózgeristerdiń túpki maqsaty – zańnyń saqtalýy men azamattardyń ádildikke qol jetkizýin tolyq qamtamasyz etý. Árbir tergeýshi qylmystyq isti qaraý barysynda ketken kishkentaı ǵana qatelik adamnyń bútin taǵdyryn ózgertip, tálkekke ushyratýy múmkin ekenin qaperine ustaýy qajet. Bul týraly Prezıdent Joldaýynda da aıtyldy, – dedi B.Aımaǵambetov.
Jalpy, oblys tergeýshileri jyl basynan beri 3 300-den astam qylmystyq isti tergep, sotqa jóneltken. Jıynda tergeý salasyndaǵy sybaılas jemqorlyq táýekelderin joıýdyń eń tıimdi joly qylmysty tergeý barysyn elektrondy formatqa kóshirý ekeni aıtyldy. Bul baǵytta biraz sharýa tyndyrylyp, oblys tergeýshileri bir jyl buryn jańa kompıýterlermen, veb-kameralarmen qamtamasyz etilgen. Qazirdiń ózinde departament qaraýyndaǵy qylmystyq istiń 53,8 paıyzy elektrondy túrde qashyqtan tergelip jatyr.
Máselen, Qarasý aýdandyq polısııa bólimi bastyǵynyń orynbasary Pavel Belov qazirgi tergeýshilerdiń zamanaýı tehnıkalyq múmkindiktermen barynsha qamtamasyz etilip jatqanyn, sonyń nátıjesinde, jyl sońyna deıin asa aýyr sanattaǵy qylmystyq isterdi qospaǵanda, barlyq isterdiń 70 paıyzyn elektrondy formatta tergeýge qol jetetinin aıtty. Ony basqa aýdandar men oblys ortalyǵyndaǵy tergeýshiler men anyqtaýshylar da qoshtap otyr.
– Polısııa jumysyndaǵy eń basty qasıet – kásibı bilik pen adal eńbek. Azamattarǵa qurmetpen qaraý, iske qatysýshylarmen kezdesýge, tergeý eksperımentine jáne jaýap alýǵa muqııat daıyndalý. Siz is boıynsha túpkilikti sheshim qabyldaısyz, búkil polısııanyń bedeli osyǵan baılanysty, – dedi B.Aımaǵambetov.
Jıynnyń sońyna taman aımaqtyń úzdik tergeýshileri men anyqtaýshylary alǵys hattarmen jáne ataýly saǵattarmen marapattaldy.
Bıyl Qarasý aýdandyq polısııa bólimi bastyǵynyń orynbasary Pavel Belov, Rýdnyı qalasy PB aǵa tergeýshisi Baqtııar Seıitbekov, Qostanaı aýdany PB-nyń aǵa tergeýshisi Anastasııa Rogojınalar oblystyń eń úzdik tergeýshileri retinde tanylyp otyr. Mysaly, polısııa maıory B.Seıitbekov jyl basynan beri jalpy sany 25 aýyr jáne asa aýyr qylmystardy tergep, isti aıaǵyna jetkizip, sotqa jiberse, Tobyl qalasynyń tergeýshisi, kapıtan A.Rogojına 45 qylmystyq isti ashqan.
Qostanaı oblysy