Senat janyndaǵy Jas sarapshylar klýbynyń ekinshi otyrysy bolyp ótti. Oǵan Senat Tóraǵasy Máýlen Áshimbaev pen elimizdiń Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın qatysty. Otyrys barysynda Klýb músheleri "Jańa zamandaǵy sıfrlyq syn-qaterler jáne ulttyq baǵdar" taqyryby boıynsha ózekti máselelerdi talqylady, dep habarlaıdy Egemen.kz
"Senat janyndaǵy Jas sarapshylar klýbynyń jumysy belsendi túrde jandanyp keledi. Kóptegen jas azamattar osy bastamaǵa qyzyǵýshylyq tanytyp, onyń jumysyna qatysýǵa nıet bildirýde. Biz Senat uıymdastyratyn túrli baǵyttaǵy is-sharalarǵa Klýb múshelerin jumyldyrýǵa basa mán beremiz. Qazirdiń ózinde utymdy usynystar men tyń ıdeıalar kelip túsip jatyr", dedi Máýlen Áshimbaev.
Sondaı-aq, Senat Tóraǵasy sapaly ınternetsiz sıfrlyq tehnologııany damytý múmkin emes ekenin aıtty. Sondyqtan senatorlar keshe ǵana ótken Palata otyrysynda Salyq kodeksin jetildirýge arnalǵan zań jobasyna jańa normalar engizdi. Ol túzetýler baılanys operatorlaryna radıojıilikti qoldanǵany úshin tóleıtin tólemniń 90 paıyzyn aýyldyq jerlerdi keń jolaqty ınternetpen qamtamasyz etýge jumsaýǵa múmkindik beredi.
"Qazirgi tańda baılanys operatorlary radıojıilikti qoldanǵany úshin jyl saıyn 17 mıllıad teńge kóleminde qarjy tóleıdi. Senatorlar osy tólemniń 90 paıyzyn olardyń ózderine qaldyrýdy usynyp otyr. Biraq operatorlar bul qarajatty, eń aldymen, aýyldyq jerlerdi keń jolaqty, sapaly ınternetpen qamtamasyz etýge jumsaý kerek. Bul – Memleket basshysynyń tıisti tapsyrmasy aıasynda óńirlerdegi ınternet ınfraqurylymyn damytýǵa arnalǵan shara", dedi Máýlen Áshimbaev.
Senat Tóraǵasy Qazaqstan halqyn, ásirese, aýyldyq jerlerdiń turǵyndaryn qoljetimdi ınternetpen jáne sapaly baılanyspen qamtamasyz etý arqyly sıfrlyq teńsizdikti joıýdyń mańyzy zor ekenin de tilge tıek etti.
О́z kezeginde mınıstr Baǵdat Mýsın osy mańyzdy máselege erekshe nazar aýdaryp, ony ońtaıly sheshýge atsalysyp jatqany úshin Senat depýtattaryna alǵysyn bildirdi jáne vedomstvo aldynda turǵan naqty syn-qaterlerge toqtalyp ótti.
"Sıfrlandyrýdyń eki jaǵy bar. Birinshisi ashyqtyq bolsa, ekinshisi – aqparat qaýipsizdigi. Halyqqa der kezinde kómek kórsetý úshin barlyq málimetti bir júıege jınaý – bizdiń mindetimiz. Mysaly, tótenshe jaǵdaı kezinde tólemderdi tóleýge qatysty máseleler málimetterdiń bolmaýynan emes, olardyń ártúrli derekter bazasynda saqtalýynan týyndady. Sondyqtan biz sıfrlandyrý arqyly halyqqa aldyn ala kómek kórsetetin júıe qurýdy kózdep otyrmyz. Biz azamattar 4 balasy bar ekenin ózderi kelip aıtqanyn kútip otyrmaýymyz kerek. Qaıta olardyń mártebesi ózgerip, kóp balaly ata-ana atanǵanyn aldyn ala bilýimiz qajet. Sol kezde járdemaqy alý, balabaqshaǵa ornalasý máselelerin sheshý jeńildeı túsedi. Infraqurylymǵa qatysty naqty túıtkilder bar. Sondyqtan óńirlerde ınternetti damytý maqsatymen operatorlardy yntalandyrý baǵytynda qoldaý kórsetkeni úshin senatorlarǵa alǵysymyzdy bildiremiz", dedi Baǵdat Mýsın.
Otyrysqa qatysqan jas sarapshylar da osy máselege qatysty óz pikirlerin bildirip, sıfrlandyrýdyń negizgi qyrlaryna toqtaldy. Klýb músheleri ashyq úkimetti damytý jáne sıfrlyq bilim berý máseleleri boıynsha, sondaı-aq, densaýlyq saqtaý salasynda sıfrlyq tehnologııany qoldaný prespektıvalaryna qatysty usynystaryn jetkizdi.
Mınıstr Baǵdat Mýsın barlyq usynysty muqııat talqylaýǵa daıyn ekenin jáne olardy aldaǵy jumys barysynda eskeretinin aıtty.