Qazynaly Kóksheniń sarqylmas bir baılyǵy – abyz pishindi aqsaqaldary. El muratyn óziniń ómirlik ustanymy etip alǵan aǵalarymyzdyń biri – Meırambek Qıyqov.
El jaıy esinen shyqpaıtyn Meırambek aǵa Uly Otan soǵysynyń 65 jyldyq mereıtoıyna oraı, sazger-jaýynger Ramazan Elebaevtyń týǵanyna 100 jyl, Qudyqaǵash aýylynyń qurylǵanyna 80 jyl tolýyna arnalǵan «Ramazan Elebaevtyń eli» dep atalatyn kitabyn shyǵardy. Atalmysh jınaqta aýdan men aýyldyń belgili adamdary jaıynda sóz bolady. Bul aýyl – kókiregińdi maqtanysh kernep, keńinen qamtyp aıtýǵa turarlyqtaı eldi meken. Shoq juldyzdaı shaǵyn eldi mekennen eki birdeı Memlekettik syılyqtyń laýreaty, eki ǵylym doktory, bes ǵylym kandıdaty shyqqan eken. Olardyń ómir joly, istegen isteri keıingi urpaq úshin úlken ónege. Uly Jeńistiń 70 jyldyǵy merekesi qarsańynda el aqsaqaly Máltaı Júnisovpen birlese aýyl ortasyndaǵy eskertkishti jańartyp, úlken is-shara ótkizdi. Shoq juldyzdaı shaǵyn aýyldan ushyp shyǵyp, árqaısysy ár qıyrda eńbek etip júrgen osy jerdiń perzentteri túgelge jýyq jınaldy.
Aýyldyń kire berisinde «Qudyqaǵash 1929» degen jazýy bar, bıiktigi 17 metrlik aspanǵa umtylǵan stella tur. Bul stellany turǵyzǵan osy aýyldyń týmasy О́mirbek Elýbaev. Bir qýanyshtysy, aǵaıyndy Asylhan, Seıilhan Sháripovter óz qarajattaryna jańa meshit salyp berdi. Toı barysynda qanshama sharýa atqaryldy.
Meırambek aǵa Alashtyń aıtýly azamaty, ǵulama ǵalym Qanysh Sátpaevtyń belsendi nasıhatshysy. Jalǵyz nasıhatshysy ǵana emes, zerdeleı zerttegen zertteýshisi. Ulyny úlgi etýdiń arqasynda 2006 jyly ǵalymdy ónege tutqan, solaı bolmaqqa umtylǵan 19 mektep túlegi Semeıdegi ken barlaý kolledjine oqýǵa tústi. 2011 jyldan beri «Altyn saqa» ulttyq oıynyn jandandyrýda áldeneshe saıys ótkizildi. Oblys turmaq respýblıkalyq deńgeıde. Bul arada ultymyzdyń umyt bolǵan salt-dástúrin tiriltsem degen maqsat jatyr.
– «Qazaqtaný» ǵylymı-aǵartýshylyq jobasynyń negizgi maqsaty – «Rýhanı jańǵyrý» baǵdarlamasyn júzege asyrý aıasynda barsha qazaqstandyqtardyń ortaq mádenı kodynyń, birtutas qundylyqtarynyń jáne jalpyulttyq tarıhı sanasynyń negizinde halyqtyń birligin nyǵaıtý, – deıdi Meırambek aǵa, – «Rýhanı jańǵyrý» baǵdarlamasy aıasyndaǵy bul joba qazaqtyń mádenıetin, tarıhyn, sondaı-aq, qazaq halqynyń ulttyq qundylyqtaryn nasıhattaýǵa baǵyttalyp otyr. Onyń ishinde qonaqjaılylyq, senim men dostyq sııaqty qasıetterdi dáripteý arqyly jastardyń boıynda eljandylyq sezimin oıatý.
Alǵashqyda Qazaqstan halqy Assambleıasynyń ortalyq apparatynan hat kelip, «Rýhanı jańǵyrý» – «Qazaqtaný» atty úlken ǵylymı-aǵartýshylyq jobasynyń jumysyn júrgizý isi Meırambek aǵaǵa tapsyrylǵan. О́ıtkeni, aǵanyń búginge deıin atqaryp kele jatqan jumysy qazaq tili men mádenıetin jas urpaqtyń sanasyna sińirý.
Álbette, joba aıasynda kóptegen is-sharalar uıymdastyryldy. Qazaq halqynyń qundylyqtaryn túsinip, nasıhattaý úshin belsendi túrde jastardy tartý – jobanyń negizgi mindetteriniń biri bolyp sanalady.
Kókshe jurtshylyǵynyń kózi úırengen bir sýret bar. Ultqa qatysty, bolashaqqa baılanysty kez-kelgen úlkendi-kishili jıynnyń naq ortasynda el muratyn kóksegen, jurt birligin armandaǵan tynymsyz bir jan júredi. Ol – Meırambek Qıyqov. Pende ǵumyr – soqtyqpaly soqpaq. Adam – jolaýshy. Izdegen joǵy eliniń este joq kezeńdegi injý-marjan ispetti salt-dástúri, ádet-ǵurpy.
KО́KShETAÝ