Qostanaı oblysynda «Otbasyndaǵy zorlyq-zombylyqqa jol joq!» dep atalatyn respýblıkalyq aksııa ótti.
Shara barysynda ýchaskelik polısııa qyzmetkerleri men psıholog mamandar otbasy-oshaq qasynda úı ishiniń berekesin alyp, áıeli men bala-shaǵasyna álimjettik kórsetýdi daǵdyǵa aınaldyrǵan azamattardyń úılerin aralady. Ár otbasynyń turmys jaǵdaıymen tanysyp, úıde neshe jan baryn, balalardyń turmysyn, olardyń ata-analarynyń jumys jaǵdaıyn surastyryp bilgen mamandar úı ishindegi tatýlyqty saqtaýdyń mańyzyn, otbasylyq janjaldyń sońy abyroı ákelmeıtinin túsindirip, ýaqytsha jumyssyz nemese jas balamen otyrǵan áıelderge turmystyq zorlyq-zombylyq máseleleri boıynsha keńes beretin senim telefondaryn qaldyrdy. О́z otbasynda álimjettik kórgen jandarǵa daǵdarys ortalyǵy men «Progress katalızatory» qoǵamdyq qorynyń bilikti psıhologteri kómek kórsetetin bolady.
Oblystyq polısııa departamentiniń málimetine sensek, bıyl aımaqta jyl basynan beri óz otbasynda turmystyq zorlyq-zombylyq kórgen 3337 áıel tirkelipti. Quqyq qorǵaýshylar munyń ótken jyldyń kórsetkishimen salystyrǵanda 29%-ǵa tómen ekenin aıtyp otyr.
«Bıyl otbasylyq-turmystyq qatynastar salasynda 6293 qorǵaý uıǵarymy shyǵaryldy. Quqyq buzýshylarǵa qatysty toǵyz júzden astam erekshe talaptar belgilendi. Bul qylmystardyń kóbi negizinen úı ishindegi qolaısyz jaǵdaıǵa baılanysty, sondaı-aq otbasyndaǵy turmystyq jaǵdaıdyń tómendigine, otbasy músheleriniń arasyndaǵy ózara syılastyqtyń, túsinistiktiń joǵalýyna nemese úıde erli-zaıyptylardyń qosylyp alyp alkogoldi sýsyn ishýiniń saldarynan týyndap otyr», deıdi polısııa departamenti baspasóz qyzmetiniń mamany Kenje Qonysbaı.
Otbasyndaǵy álimjettiktiń aldyn alý maqsatyndaǵy shara barysynda polısııa qyzmetkerleri daǵdarys ortalyǵynyń psıhologterimen birlesip, esepte turǵan otbasy múshelerine túsindirý jumystaryn júrgizgen. Mamandar pandemııaǵa baılanysty aımaqta qabyldanyp jatqan karantındik shekteý sharalarynyń otbasylyq qarym-qatynasqa teris yqpal etip otyrǵanyn aıtady. Máselen, bıyl jyl basynan beri daǵdarys ortalyǵyna 696 áıel ótinim túsirip, psıhologııalyq kómekke júgingen. Ortalyq mamandary 117 áıelge psıhologııalyq kómek kórsetip, óz otbasynan qaǵajý kórgen 867 áıelge telefon arqyly keńes bergen. Ortalyq 4 áıelge psıhologııalyq, moraldyq qoldaý kórsetýmen qatar, óz qamqorlyǵyna alyp, ýaqytsha baspanamen qamtamasyz etip otyr.
Oblystyq Polısııa departamenti Jergilikti polısııa qyzmeti basqarmasynyń qyzmetkerleri jáne «Progress katalızatory» qory sońǵy aptanyń ózinde otbasynda jábir kórgen 9 áıel men 10 balaǵa kómek kórsetti.
Qostanaı oblysy