Lısakovta birneshe kásipker birlesip, qalanyń ortalyǵyndaǵy adam eń kóp jınalatyn kópshilik oryndarǵa úsh birdeı teplovızor ornatty. «Qazir álemniń qaı túkpirinde bolsyn pandemııaǵa qarsy kúres júrip jatyr. Biz de tek jergilikti bıliktiń aýzyna qarap otyra bermeı, ózimiz ómir súrip jatqan qalanyń qaýipsizdigin qamtamasyz etýge múmkindigimizshe úles qosýdy jón kórdik», deıdi kásipkerler.
Sergeı Starkov ıelik etetin kondıterlik sehyn búkil qala jurty jaqsy biledi. Qoly ashyq azamat jerlesterinen qolynan kelgen jaqsylyǵyn aıap kórgen emes. Álemdi jaılaǵan indet Lısakovqa da jetip, qalanyń ústin qaýip bulty torlaı bastaǵanda Sergeı ákimdikke baryp, qandaı kómek kerek ekenin surapty.
– Lısakov ákimdigine baryp, aqyldasyp-keńesip, sapaly teplovızor alý kerek degen sheshimge toqtadyq. Gýanchjoýdaǵy medısınalyq qurylǵylar shyǵaratyn qytaılyq zaýyttardyń birimen jaqsy baılanystamyn. Tikeleı tapsyrys berýge múmkindik bar. Bul oıymyzdy Sergeı Bervagen, Roman Sýhın, Alekseı Aman, Álıhan Boranbaev sekildi kásipkerler de qoldaı ketti, – deıdi ol.
Kásipkerler qolǵa alǵan ıgi bastamaǵa jergilikti ákimdik «Rýhanı jańǵyrý» baǵdarlamasy sheńberindegi «Kórkeıe ber, Qostanaı» jobasy aıasynda qoldaý bildirgen. Ár teplovızordyń quny 445 myń teńge turady. Qurylǵy qol tazalaıtyn sanıtaızermen jabdyqtalǵan. Kásipkerler Gýanchjoý zaýytyna eshbir deldalsyz tikeleı tapsyrys beripti. Bir aıdan keıin úsh teplovızor Lısakovqa jetip, qala ákimdiginiń front-keńsesine, halyqqa qyzmet kórsetý ortalyǵyna jáne turǵyndar kommýnaldyq qyzmet tóleıtin ortalyqqa ornatyldy.
Sergeı Starkovtyń sózinshe, jańa teplovızorlar adamnyń dene qyzýyn aına-qatesiz dál kórsetedi eken jáne kúnniń ystyq-sýyǵyna qaramaı, tipti 40 gradýstyq qaqaǵan aıazda da múdirmeı jumys isteı beredi.
– Bul – «not touch» júıesimen qamtylǵan «Sunchip» markaly teplovızorlar. Kádimgi kompıýter sııaqty jumys isteıdi. Dene qyzýyn teksergen árbir adam týraly jeke málimetterdi saqtap, sýretke túsirip otyrady. Aldyndaǵy adamnyń maska taqqan-taqpaǵanyna deıin tekserip, nátıjesin saqtap qoıady. Bul teplovızordyń taǵy bir ereksheligi – qurylǵy ózinde saqtalǵan málimetterdi qajet jerge jibere alady. Mysaly, teplovızordy qalalyq emhanalarmen baılanystyrsaq, qurylǵy ózindegi málimetterdi tikeleı emhanaǵa jiberip otyrady. Bul isi bastan asyp jatqan dárigerlerdiń de jumysyn sál de bolsa jeńildetedi, – dedi kásipker.
Teplovızorlardyń biri qala ákimdiginiń janynan ashylǵan front-keńseniń kireberisinde tur. Front-keńsege kelýshiler ǵımaratqa kirmesten buryn teplovızordyń aldyna toqtap, ekranǵa qaraıdy. Adamnyń bet-beınesi kompıýter monıtoryndaǵy shekara syzyǵyna syıyp turýy kerek. Aqyldy qurylǵy dene qyzýy qalypty adamǵa «Sizdiń temperatýrańyz qalypty» dep jaýap qatyp, ekranda jasyl tús janady. Eger nátıje kerisinshe shyqsa, ekran beti qyp-qyzyl túske boıalyp, robot «Dene qyzýyńyz kóterilip tur! Maska taǵyńyzdar» dep aıqaıǵa basyp, dabyl kótere bastaıdy. Lısakovtyqtar teplovızor-robottyń adamdy tekserýden ótkizip qana qoımaı, kópshiliktiń kóńil kúıin kóterip, jurtty kúldiretinin qyzyq kóredi. Baǵdarlamashylar taıaý kúnderi teplovızorlardyń barlyq múmkindigin iske qosady. Osydan keıin «aqyldy» robottar kópshilik oryndardyń qaýipsizdigin qadaǵalaıtyn naǵyz sanıtar-saqshylarsha jumys isteı bastaıdy.
Qostanaı oblysy,
Lısakov qalasy