Eýrazııalyq ekonomıkalyq komıssııa (EEK) Eýrazııalyq ekonomıkalyq odaqtyń ıntegrasııalanǵan aqparattyq júıesine (IAJ, EAEO) keshendi tehnıkalyq saraptama júrgizý jónindegi oryndaýshyny aıqyndaý konkýrsyna qatysý úshin ótinimder qabyldaýdy bastady.
Integrasııalanǵan aqparattyq júıe (IAJ) – memleketaralyq derekter men elektrondy qujattar almasýdy qamtamasyz etýge arnalǵan jáne EAEO aıasyndaǵy aýqymdy joba. Bul jumysqa qatysý IT kompanııalarǵa halyqaralyq naryqqa shyǵýǵa, óz áleýetin ashýǵa jáne bedelin arttyrýǵa múmkindik beredi.
Bıyl 19 mamyrda Memleket basshylarynyń otyrysy aıasynda Prezıdent Q.Toqaev IAJ-dy iske qosý boıynsha jumystardy jandandyrý qajettigin aıtqan edi. Osy maqsatta EEK Keńesi keshendi tehnıkalyq saraptama júrgizý týraly sheshim qabyldady.
Keshendi tehnıkalyq saraptama sheńberinde oryndaýshy júıeli-tehnıkalyq ınfraqurylymdy, jobalyq basqarý bóliginde IAJ-dyń aýqymdy aýdıtin, sondaı-aq quqyqtyq aktilerge taldaý júrgizýi tıis. Keshendi tehnıkalyq saraptama atalǵan júıeniń álsiz jerlerin anyqtaýǵa, qol nátıjelerdi taldaýǵa jáne aqparattyq ózara is-qımyldy qamtamasyz etý boıynsha jańa tásilderdi qalyptastyrýǵa jol ashady. Keshendi tehnıkalyq saraptamanyń nátıjelerin EEK Keńesi kelesi jyldyń 1-toqsanynyń sońynda qaraıdy dep josparlanýda.