Qazaqstan men Koreıa arasyndaǵy saýda-ekonomıkalyq jáne ǵylymı-tehnıkalyq yntymaqtastyq jónindegi úkimetaralyq komıssııanyń 9-otyrysy beınekonferensııa rejiminde ótti, dep habarlaıdy Egemen.kz.
Qazaqstan jaǵynan komıssııanyń teń tóraǵasy - QR Indýstrııa jáne ınfraqurylymdyq damý mınıstri Beıbit Atamqulov, Koreıa tarapynan osy eldiń Saýda, ındýstrııa jáne energetıka mınıstri Son Iýn Mo.
Úkimetaralyq komıssııa otyrysynyń kún tártibinde Qazaqstan-Koreıa seriktestiginiń barlyq negizgi salalary: saýda jáne ekonomıka, ınvestısııalyq yntymaqtastyq, ónerkásip jáne energetıka, kólik jáne logıstıka, aýyl sharýashylyǵy, mádenıet jáne týrızm máseleleri qamtyldy.
Eki el arasyndaǵy saýda-ekonomıkalyq jáne ǵylymı-tehnıkalyq yntymaqtastyq jónindegi úkimetaralyq komıssııa otyrysyn ashqan QR Indýstrııa jáne ınfraqurylymdyq damý mınıstri Beıbit Atamqulov Qazaqstan Koreıa Respýblıkasynyń Ortalyq Azııadaǵy iri saýda seriktesi ekenin atap kórsetti. Elimizde qazirgi ýaqytta koreıa kapıtalynyń qatysýymen 400-den astam birlesken kásiporyn jumys isteıdi. Sońǵy 15 jylda Koreıadan Qazaqstanǵa 12 mlrd. AQSh dollaryna jýyq tikeleı ınvestııa salynǵan.
Mınıstr Son Iýn Mo atqarylyp jatqan jumystarǵa qanaǵattanarlyq bildirip, «Samal jel» birlesken ekonomıkalyq baǵdarlamasy aıasynda elderimiz arasynda 58 túrli baǵyt boıynsha yntymaqtastyq ornatylǵanyna toqtaldy.
Otyrysqa qatysýshylar eki jaqty saýdanyń qazirgi jaǵdaıy men kólemin qarastyryp, Qazaqstan men Koreıa arasyndaǵy taýar aınalymyn ári qaraı arttyrý múmkindikterin talqylady. Sondaı-aq, Koreıa Respýblıkasynyń Prezıdenti Mýn Chje Innniń ótken jyldyń sáýir aıynda Qazaqstanǵa jasaǵan memlekettik sapary eki el arasyndaǵy ózara yntymaqtastyqty tereńdetýge eleýli úles qosqanyn atap ótti.
Sonymen qatar taraptar Hyundai Motor Company jáne Astana Motors kompanııalarynyń Almaty qalasynda avtomobıl qurastyrý zaýytyn sátti iske qosqanyna toqtalyp, elimizde avtomobılge arnalǵan qurastyrýshy bólshekter óndirisin arttyrýǵa múddelilik tanytty.
Logıstıka, tranzıt jáne konteınerlik júk tasymaldary, jer qoınaýyn paıdalaný, sandyq tehnologııalar jáne memlekettik-jekemenshik seriktestik negizinde ınfraqurylymdyq jobalardy damytý perspektıvalary talqylandy. Atap aıtqanda, qalalar men negizgi avtomagıstraldarda Krıo janar-jaǵarmaı stansalaryn salýdy jalǵastyrýǵa, ońtústik koreıalyq tehnologııamen Qazaqstanda energııa únemdegish shamdar óndirisin jolǵa qoıýǵa qyzyǵýshylyq bildirdi.
Qazaqstan delegasııasy eksporttyq áleýeti zor qazaqstandyq taýarlar tizimimen Koreıanyń ımporter kompanııalaryn tanystyrýǵa usynys jasap, aýyl sharýashylyǵy salasynda «naqty eginshilik» jáne «aqyldy fermerlik», qurylys salasynda VIM-tehnologııalaryn engizýge múddelilik tanytty.
Koreıa tarapynan otyrysqa qatysýshylar Qazaqstannyń spýtnıktik baǵdarlamalaryna qatysýǵa qyzyǵýshylyq bildirdi.
Jıyn qorytyndysynda eki eldiń mınıstrleri Komıssııa jumysy barysynda eki jaqty yntymaqtastyqtyń ózekti máselelerin talqylaý men sheshýde pármendi mehanızm jáne qolaıly alań retinde kórsetkenin atap ótti.
Qazaqstan men Koreıa arasyndaǵy saýda-ekonomıkalyq jáne ǵylymı-tehnıkalyq yntymaqtastyq jónindegi úkimetaralyq komıssııanyń 9-otyrysynyń qorytyndysynda tıisti hattamaǵa qol qoıyldy.