Quny 12,5 mln teńgege bolatyn geroındi Jitiqara turǵyny edenniń astynda saqtaǵan, - dep habarlaıdy Egemen.kz
Jitiqarada 39 jastaǵy jergilikti turǵynnyń úıinen jarty kılogramm geroın tabyldy. Tártip saqshylarynyń sózinshe, esirtkiniń quny 12,5 mln teńge bolady eken. Polıseıler atalmysh úıden geroınmen birge, tarazy jáne 1 mıllıon teńgeden astam aqsha tárkiledi.
«Preparat» respýblıkalyq jedel aldyn alý is-sharasy aıasynda júrgizilgen arnaıy operasııa jóninde Jitiqara qalasy jáne aýdandyq polısııa bólimi bastyǵynyń orynbasary Álibek Shandalınov aıtyp berdi.
- Esirtki taratýshyny ustaý sharasy 2020 jyldyń qazan aıynda bastaldy. Bizge qala aýmaǵynda geroın paıda boldy degen aqparat keldi. Júrgizilgen jedel tergeý is-áreketteri arqyly biz esirtki taratýshyǵa shyqtyq. Shekara qyzmeti men polısııanyń arnaıy bólimshesiniń kómegimen 39 jastaǵy qala turǵyny janarmaı quıý beketiniń janynda ustaldy, - deıdi Álibek Shandalınov.
Kúdiktiniń úıi men garajyna tintý júrgizgen polısııa jalpy salmaǵy 499 gramm geroındi tárkiledi. Kúdikti esirtkini edenniń astyna jasyryp qoıǵan. Tergeý áreketterin júrgizý kezinde qyzmettik izdestirý ıtteri paıdalanylǵan.
Qazir qylmystyq kodekstiń «asa iri mólsherde esirtki zattaryn ótkizý maqsatynda zańsyz daıyndaý, qaıta óńdeý, satyp alý jáne saqtaý, tasymaldaý» baby boıynsha sotqa deıingi tergeý bastaldy. Qylmystyq isti tergeý aıasynda oblysqa esirtkiniń qaıdan ákelinip jatqany anyqtalýda.
Aıta keteıik, jyl basynan beri aımaqta 473 kılogramnan astam túrli esirtki quraldary, onyń ishinde 730 gramm geroın jáne 260 gramm sıntetıkalyq psıhotroptyq zattar tárkilendi.
Qostanaı oblysy