Almaty qalasynda "Adamzattyń asyly – Mustafa" atty rýhanı onlaın Máýlit keshi ótti, dep habarlaıdy Egemen.kz
Máýlit keshi Ersin qarı Ámiriniń Quran oqýymen bastaldy. Budan keıin belgili aqyn, sazger Jáken Omarov eki jyldan beri eksklıýzıv dep tanylǵan qazaqsha máýlittiń úshinshi bólimin jyrlady.
Jáken Omarov 2018 jyly oryndap bastaǵan qazaqsha máýlit jyrynda Paıǵambarymyzdyń (oǵan Allanyń salaýaty men sálemi bolsyn) dúnıege kelýi men qyryq jasqa (paıǵambarlyqqa) deıingi ómirin baıandaǵan edi. Byltyrǵy Máýlit jyry alǵashqy ýahıdyń kelýinen (paıǵambarlyq mıssııanyń bastalýy) bastap Paıǵambarymyzdyń (oǵan Allanyń salaýaty men sálemi bolsyn) Mekkede dindi jaıýy, sahabalardyń Islam dinine kirýi, Mıǵraj sapary, sońynda múshrikterden qysym kórgeni jáne Mádınaǵa qonys aýdarýymen aıaqtalǵan-dy. Al bıylǵy Máýlit jyrynda Jáken Omarov Paıǵambarymyzdyń (oǵan Allanyń salaýaty men sálemi bolsyn) Mádına qalasyna kelýinen bastap Bádir shaıqasyna deıingi kezeńdi jyrlap, kórermenderge erekshe áser syılady.
Almatydaǵy Máýlit keshi barysynda QMDB Tóraǵasy, Bas múftı Naýryzbaı qajy Taǵanuly onlaın quttyqtaý joldady. Bas múftı barsha qazaqstandyqtar men musylman jamaǵatty Máýlit merekesimen quttyqtap, Paıǵambarymyzdyń (oǵan Allanyń salaýaty men sálemi bolsyn) ónegeli ómiri men dinimizdiń asyl qundylyqtary jaıly aıtty.
Onlaın Máýlit keshinde Ǵ.Músirepov atyndaǵy Qazaq memlekettik balalar men jasóspirimder teatry arnaıy ázirlegen ǵıbratty qoıylymel nazaryna usynyldy. Qoıylymda bizden buryn ómir súrgen izgilerdiń Paıǵambarymyzdyń (oǵan Allanyń salaýaty men sálemi bolsyn) aq jolyn qalaı ustanǵany jáne din degen uly amanatty keler urpaqqa qalaı jetkizgeni týraly saýaldarǵa hıkmetpen jaýap beriledi. Sondaı-aq "О́ner qyrandary" ázil-syqaq teatry men Sáken Maıǵazıevtiń Smart mektebi Máýlit keshine arnap sahnalyq qoıylym ázirledi.
Kesh basynda ánshiler Ergen Aıtymbetov "Ál-Muhtar" , Raıym Ýaıys, Ergen Aıtymbetov, Serjan Álı, Qanatbek Polatbek "Mustafa" ánderin, Jasulan Musaǵalı" Men qazaqpen" termesin tebirene shyrqady. Odan bólek onlaın Máýlit keshiniń ataýymen jańa kitap jaryq kórdi. QMDB-ǵa qarasty "Imam Matýrıdı" ǵylymı-zertteý ortalyǵynyń ázirlegen bul eńbek – ǵulama Hafız Muǵaltaı ıbn Qylysh Hanafıdiń "Adamzattyń asyly – Mustafa" atty kitabynyń aýdarmasy. Kitapty óńdep, ǵylymı siltemeler bergen Muhammed Nızamýddın Fýtaııh. MUFTYAT baspasynan shyqqan eńbekte Paıǵambarymyzdyń (oǵan Allanyń salaýaty men sálemi bolsyn) ǵıbratty ǵumyry men tálimgerlik taǵylymy baıandalǵan. Kitap rýhanı kemeldikti izdegen barsha oqyrman qaýymǵa arnalǵan. Qundy eńbektiń jalpy redaksııasyn basqarǵan – Almaty qalasynyń bas ımamy Erkinbek Shoqaı, Nur-Múbárak ýnıversıtetiniń ustazy, belgili ǵalym Baýyrjan Álıuly jáne Almaty qalasy "Tóle bı" meshitiniń bas ımamy Ersin Ámire. Eńbekti qazaq tiline aýdarǵan – ıslamtanýshy Erjan Dosqalıuly.
Kitap Aqparat jáne qoǵamdyq damý mınıstrligi Qoǵamdyq kelisim komıteti tarapynan júrgizilgen dintaný saraptamasynyń jáne QMDB Sharıǵat jáne pátýa bólimi tarapynan júrgizilgen saraptamanyń oń qorytyndysyn alǵan.