Ár donordyń tamyrynan alynǵan qan jyl saıyn myńdaǵan adamdy ajaldan arashalap qalady. Kúrdeli hırýrgııalyq otalar jasalyp jatqan kezde eki dúnıeniń arasynda arpalysyp jatqan naýqasqa ómir qoregin tamyzatyn da – osy donordyń qany.
Qostanaıdaǵy oblystyq qan ortalyǵy taıaýda «Qan tapsyr da, ómirdi qutqar» dep atalatyn aksııa uıymdastyrdy. Atalǵan sharaǵa «Sarybaı-Sokolov» ken baıytý kombınatynyń kenshileri túgel qatysyp, janashyrlyqtyń úlgisin kórsetti. Rýdnyılyq kenshiler jyl saıyn ujym bolyp uıymdasyp, ortalyqqa kelip qan tapsyrýdy dástúrge aınaldyrǵan.
– Densaýlyq bolyp turǵanda, ár adam qan tapsyryp, ózgeniń ómirin qutqaryp qalýǵa kómektesý kerek. Bul – kez kelgen izgi qoǵamǵa qajet adamgershiliktiń belgisi. Men mundaı ıgi sharalarǵa únemi qatysyp turamyn. Qan tapsyrǵan saıyn kóńil kúıim kóterilip, janym sergip, bir rahattanyp qalamyn. Jaqsylyq jasaǵanǵa ne jetsin! – deıdi jas kenshi Mádı Qambarov.
Ár donor 450 ml kóleminde qan tapsyrdy. Mundaı mólsherde qan joǵaltý saý adamnyń aǵzasyna eshbir fızıologııalyq qaýip týdyrmaıdy. Ortalyq mamandarynyń aıtýynsha, donorlyq adam densaýlyǵyna paıdaly asa paıdaly kórinedi.
Bul sharanyń alǵashqy kúni kásiporynnyń 50-den asa jumysshysy 25 lıtr qan tapsyrdy qan tapsyrdy. Bul kem degende 100 shaqty naýqastyń ómirin arashalap qalýǵa jetedi, deıdi dárigerler.
Qostanaı oblysy