Almaty qalasynyń ákimi Baqytjan Saǵyntaev óziniń Facebook paraqshasynda Tóle bı kóshesinde 13 aǵashtyń zańsyz kesilýine qatysty oqıǵany óz baqylaýyna alǵanyn jazady, dep habarlaıdy Egemen.kz
"23 qarashaǵa qaraǵan túni "Sulpak" SÚ janynda zańsyz 13 aǵash kesildi. Bul óreskel oqıǵa Prezıdent pen qoǵamnyń narazylyǵyn týdyrdy. Qala ákimdigi aǵash kesýge ruqsat bergen joq. Qorshaǵan ortaǵa keltirilgen zaqymnyń mólsheri esepteledi.
Mamandandyrylǵan tabıǵatty qorǵaý prokýratýrasy zańsyz aǵash keskeni úshin QR QK 340-baby boıynsha sotqa deıingi tergeý isin bastady. Is Almaly aýdanyna qarasty PB-nyń qaraýyna berildi. Almaty PD bastyǵy Q.Taımerdenovke isti tolyǵymen qarap, onyń obektıvtiligin qamtamasyz etip, kinálilerdi anyqtap, jaýapkershilikke tartý tapsyryldy.
Qazirgi ýaqytta saýda úıiniń janyndaǵy aýmaqty "Arena S" JShS-ǵa qarasty (Sulpak) JK "Sakýra" men "Býrıbekova" merdigerleriniń abattandyrǵany anyqtaldy. "Sakýra" JK-nyń basshysy QR ÁQBtK 437 baby boıynsha túngi ýaqytta azamattardyń tynyshtyǵyn buzǵany úshin ákimshilik jaýapkershilikke tartyldy.
Istiń barysy týraly jurtshylyqty habardar etip otyramyz. Bul másele meniń jeke baqylaýymda", dep jazdy qala basshysy.