Ekologııalyq shara barysynda belsendi jastar oblys turǵyndaryna quramynda synap bar turmystyq qaldyqtardy joıýdyń durys jolyn túsindirdi. Jergilikti telearnalar men qoǵamdyq oryndardaǵy LED-ekrandar arqyly synaptyń zııany jóninde shaǵyn beınebaıandar kórsetilip, oqý oryndarynda osy taqyrypqa arnalǵan konkýrstar uıymdastyryldy.
Al oblys ortalyǵyndaǵy iri saýda oryndarynyń birinde eresekter men balalarǵa arnalǵan vıktorına ótti. Sonymen qatar ekovolonterler qala turǵyndary kóp júretin oryndar men avtobýs aıaldamalaryna synaptan tónetin qaýip týraly plakattar japsyryp, qala turǵyndaryna tanymdyq-aqparattyq býkletter taratty.
Aksııany uıymdastyrýshylardyń aıtýynsha, turǵyndardyń, ásirese elektr qýatyn únemdeıtin shamdardy syndyryp alýdan saq bolǵany abzal. О́ıtkeni qýat únemdegish shamnyń ishinde adam aǵzasy úshin asa qaýipti sanalatyn synap býy bar. Máselen, abaısyzda synyp qalǵan bir shamnyń ózi aınalaǵa shoǵyrlanǵan synap mólsherin birneshe saǵat boıy arttyryp, 6 tekshe metr aýany ýlaıdy eken. Iissiz ári zııandy býmen tynystaǵan adamnyń aǵzasyna synap sińip, onyń arty qaıǵyly jaǵdaıǵa ulasýy múmkin. Synap býynyń, ásirese áıelder men balalarǵa tıgizetin zııany mol. Sondyqtan qaýipten saqtanýdyń birden-bir joly – quramynda synaby bar qaldyqtardy basqa turmystyq qaldyq túrlerine aralastyrmaı, bólek jınaý. Volonterler turǵyndarǵa isten shyqqan elektr shamdaryn qaladaǵy qoqys oryndaryna arnaıy qoıylǵan qyzylsary konteınerlerge jınaýǵa keńes berdi.
Qostanaı oblysy