Qostanaı oblysynyń Áýlıekól aýdanynda ashylǵan ortalyq qıyn jaǵdaıǵa dýshar bolǵan eresekter men balalarǵa psıhologııalyq qoldaý kórsetedi.
Áýlıekól aýdandyq ishki saıasat bóliminiń tapsyrysymen eki jylǵa mejelengen áleýmettik jobany Qostanaı oblysynyń psıhologter assosıasııasy júzege asyra bastady. Psıholog Evgenııa Iýrınanyń aıtýynsha, aýdannyń kez kelgen jastaǵy turǵyny jańa ortalyqqa kelip, basyndaǵy jaǵdaıǵa qatysty tegin keńes ala alady. Ortalyq mamandary kóbine otbasynda oryn alyp jatatyn zorlyq-zombylyq, janjaldardy sheshýge daıynbyz dep otyr.
– Biz kúızeliske ushyraǵan otbasylar men balalarǵa psıhologııalyq jáne áleýmettik-quqyqtyq kómek kórsetemiz. Osy maqsatta aýdandyq probasııa qyzmetimen jáne bilim bólimimen tyǵyz baılanysta jumys júrgizip jatyrmyz, – dedi joba jetekshisi Iýlııa Kalıýjnaıa.
Psıhologterden quralǵan mobıldi toptar 10 shaqty shaǵyn eldi mekendi aralap, aýyl jastarynyń kúızeliske qarsy kúres daǵdylaryn damytýǵa arnalǵan arnaıy trenıngter ótkizip, ata-analarǵa psıhologııalyq keńes berdi. Sonymen qatar aýdannyń jergilikti muǵalimderi men psıhologterine otbasyndaǵy zorlyq-zombylyq máselesine qatysty semınarlar ótkizip jatyr.
Mamandardyń sózinshe, ortalyqqa kelýshilerdiń kóbi kámelet jasqa tolmaǵan jasóspirimder eken.
– Olardyń ishinde ata-anasymen nemese qurbylarymen janjaldasyp qalǵandar, turmysy tómen otbasynda turyp jatqan jasóspirimder bar. Bizdiń mamandarymyz olarǵa psıhologııalyq turǵyda qoldaý kórsetip, balalardyń kúızelis jaǵdaıynan shyǵýyna kómek kórsetedi. Qandaı jaǵdaıda bolmasyn, balanyń múddesin qorǵap qalýymyz kerek. Bul maqsatta probasııa qyzmetimen birlesip atqarǵan jumysymyz óz jemisin berýde. Mysaly, osy aýdanda turatyn kámeletke tolmaǵan bala óz týysynyń yqpal etýimen urlyq jasaǵan. Ańdamaı basyp, qylmysqa barǵan jasóspirimniń ózi osydan keıin tereń kúızeliske túsip, probasııa qyzmetiniń usynysymen bizdiń ortalyqqa keldi. Mamandar balaǵa psıhologııalyq kómek kórsetýde. Balanyń anasy da bizge jıi bas suǵyp turady.
Bıyl mynadaı oqıǵa oryn aldy. Buryn balalar úıinde tárbıelengen eki balany týystary asyrap alǵan. Biraq biraz ýaqyt ótken soń balalardyń ol otbasynan qashyp ketkeni týraly habar aldyq. Joǵalǵan balalardy eki kún boıy izdestirip júrip áreń taptyq. Olar sodan beri bizdiń ortalyqta turyp jatyr. Taıaýda ǵana balalardyń jaqyn týystary tabylyp, eki balany da asyrap alatyndyqtaryn habarlady, deıdi E.Iýrına.
Psıhologter qamqorlyq mekemelerimen de tyǵyz baılanysta jumys istep keledi. Daǵdarys ortalyǵynyń mamandary atalǵan mekemelerdiń ókilderimen birge turmysy tómen 30 shaqty otbasyn aralap, turmystyq, psıhologııalyq keńes bergen.
Qostanaı oblysy