Bıyl Bulandy aýdanynda aq túıeniń qarny jarylǵan súıinishti oqıǵalar kóp. Sonyń biri retinde aýdandaǵy 42 kóp balaly otbasynyń baspanaly bolǵanyn aıtsaq bolady.
Jalpaq jurtqa jaqsy úlgi bolýǵa ábden jaraıtyn kóp balaly otbasylardy shadyman shattyqqa bólegen qamqorlyqty jergilikti seriktestik jasap otyr. Olar uzaq ýaqyttan beri jaıly da jaryq baspanaǵa qoly jetpeı kele jatqan osynaý otbasylarǵa jańa páterlerdiń kiltin tabys etip, júrek jylýymen jylytyp, mereılerin tasytyp jiberdi. Aıtalyq, taıaýda baspanaly bolǵan Bınımandar men Chýmakovtardyń kóp balaly otbasylary dál osyndaı aqjarylqap sátti uzaq ýaqyttan beri tosqan edi. Burynǵy turǵan úıleri apatty jaǵdaıda bolatyn. Basqa barar jerleri bolmaǵan soń, amalsyzdan áldeneshe jyl ábden kónergen, eski úılerdi panalap kelgen. Taıaýda seriktestik óz qarajaty esebinen eki úı satyp áperdi. Turýǵa ábden jaraıtyn úılerdi tap-tuınaqtaı etip jóndep, tirshilikke qajetti ınfraqurylymdar tartyp berdi.
– Minekı, qolyma jańa baspananyń kilti tıdi. Dál osyndaı úıge ıe bolamyn dep armandaǵan emespin. Eńsesi bıik, úlken, jyly úı. Janashyr adamdardyń osyndaı esińnen ketpes qamqorlyq jasaǵany qandaı jaqsy. Bizdiń ortaq Otanymyz – Qazaqstanda árkim de osyndaı jaqsylyqtyń sharapatyn kórip jatsa, ǵanıbet emes pe?! – deıdi Kapıtonovka aýylynyń turǵyny Konstantın Bınıman.
Ekinshi úıge ıe bolǵan Sergeı Chýmakov ta – osy topyraqtyń týmasy ári kóp balaly áke. Sergeı baspanamen qamtamasyz etken «Jýravlevka-1» seriktestiginiń basshylyǵy men ujymyna alǵysyn aıtyp taýysa alar emes.
Jergilikti atqarýshy bılik shaǵyn aýyldaǵy aldarynan jumys úrkip otyratyn eńbekqor turǵyndardy árdaıym baǵalap, olardyń muń-muqtajyna jiti nazar aýdaryp, kómek-qoldaýyn kórsetip otyrady. Joǵaryda aıtylǵan eki otbasynyń otaǵasy da atalǵan seriktestikte uzaq jyldan beri qajyrly eńbek etip keledi. Sondyqtan búgingideı qýanyshqa bólenýge ábden haqyly. О́z kezeginde olar da qamqorlyqtyń mánin etene túsinip, aldaǵy ýaqytta jasalǵan jaqsylyqtyń qarymtasyn qaıtaramyz dep bilekterin sybanyp otyr.
– Okrýgte kóp balaly on otbasy bar. Olardyń ekeýi baspanaly boldy. Aldaǵy ýaqytta qalǵan kóp balaly otbasylarǵa da osyndaı kómek kórsetilýi ábden múmkin. Aýyldyq jer bolǵanymen, úıler de arzan emes. Árqaısysy shamamen 6 mln teńge turady, – deıdi aýyldyq okrýgtiń ákimi Baqyt Raqymjanova.
Aýdanda ótken jyly kóp balaly 15 otbasy qonys toıyn toılady. Búginde bul kórsetkish 42-ge jetip otyr. Jaryq dúnıede úbirli-shúbirli urpaq órbitip, bolashaqtyń tileýin tilep otyrǵan kóp balaly otbasylardy jan jylýymen jylytqannan artyq qýanysh bolar ma eken?!
Aqmola oblysy,
Bulandy aýdany