Flot

Prezıdent N.Á.Nazarbaev jáne respýblıka Áskerı-teńiz kúshteri týraly kontr-admıral R.Á.Komratovpen áńgime

– Ratmır Álimhanuly! Ege­mendiktiń eleń-alań shaǵynda memleketimizdiń Áskerı-teńiz kúshterin qurýǵa alǵash­qy qadamdar jasalǵany belgili. Teńiz betten qoıylǵan qalqan, pana sekildi osy bir mańyzdy sáttiń kýágeri de, bel ortasyn­da bilek sybana júrgen keıipkerleriniń biri de ózińizsiz. Táýel­sizdiktiń turaqtylyǵy, el irgesiniń bútindigi úshin jasalǵan jaqsy is qalaı, neden bastalyp edi?

Prezıdent N.Á.Nazarbaev jáne respýblıka Áskerı-teńiz kúshteri týraly kontr-admıral R.Á.Komratovpen áńgime

– Ratmır Álimhanuly! Ege­mendiktiń eleń-alań shaǵynda memleketimizdiń Áskerı-teńiz kúshterin qurýǵa alǵash­qy qadamdar jasalǵany belgili. Teńiz betten qoıylǵan qalqan, pana sekildi osy bir mańyzdy sáttiń kýágeri de, bel ortasyn­da bilek sybana júrgen keıipkerleriniń biri de ózińizsiz. Táýel­sizdiktiń turaqtylyǵy, el irgesiniń bútindigi úshin jasalǵan jaqsy is qalaı, neden bastalyp edi?

– Meniń taǵdyryma teńiz per­zenti bolý jazylypty. Týǵan elim Qazaqstan óz egemendigin al­ǵan kezeńde Reseı Federasııasy Qorǵanys mınıstrliginde qyzmette bolatynmyn. Uly jańalyqty Oral qalasyndaǵy áskerı kásip­oryndardy kórýge kelgen issapa­rymda estidim. Keýdemdi qýanysh kernep, Qazaqstan Úkimetine elge oralǵym keletinin aıtyp hat jazdym. Osy ótinishten soń, 1992 jyldyń kókteminde respýblıkanyń tuńǵysh Qorǵanys mınıstri, general-polkovnık Saǵadat Nurma­ǵambetov qabyl­dap, áskerı-teńiz bazasynyń komandıri etip Aqtaý qalasyna attan­dyrdy. Ol kez aqjal tolqyndary aspanǵa atyp, jas memleketimizdi birneshe sheteldermen shektestiretin asaý Kaspııdiń tóńiregindegi, ıaǵnı elimizdiń batys aımaǵynda áskerı-teńiz kúshteri endi ǵana qolǵa alyna bastaǵan, áli aıaǵynan tik turyp ketpek túgili, tusaýy da kesile qoımaǵan sát edi. 1993 jyldyń sáýir aıynda elimizdiń Tuńǵysh Prezıdenti, Qarýly Kúshterdiń Joǵarǵy Bas qolbasshysy Nursultan Ábishuly Nazarbaevtyń «Qazaqstan Respýb­lıkasy Qarýly Kúshteri qura­mynda Áskerı-Teńiz kúshteri quryl­syn» degen Jarlyǵy bizge tyń ekpin, isimizge serpin berdi. Moraldyq-psıhologııalyq turǵydan qanattandyrdy, ári tapsyrma, buıryq retinde oryndalýy tıis ekenin mindettedi.

– Joqtan bar jasaý ońaı bolma­ǵan shyǵar?

– Árıne. Keńes Odaǵy taraǵan soń-aq onyń quramynda bolǵan árbir memleket úshin armııa, áskerı kúsh máselesi kún tártibine shyǵa keldi. Bizdiń Elbasymyz osy máselege aıryqsha jáne der kezinde mán berdi. Tipti sol tustarda: «Qazaqstanǵa Áskerı-teńiz kúshteri qajet pe?» degen saýaldar da pikirtalasqa negiz bolyp jatty. Baza joq, mamandar joq, katerler taǵy joq. Joq... Joq. Osyndaı jaǵ­daıda táýekel etýdiń qıyndyǵy aıtpasa da túsinikti dep oılaımyn. Biraq, qalaı bolǵanda da Iran, Ázerbaıjan, Reseımen shektesetin teńiz betti qadaǵalap, qorǵap turatyn áskerı qurylym kerek bolatyn. Qorǵanys mınıstrligindegi az ǵana teńizshi áriptester bolyp, Elbasyna hat jazdyq. Máseleniń ózektiligin birden tanyǵan Nursultan Ábish­uly: «Elimizdiń Áskerı-teńiz kúshterin quraıyq», dep dereý qoldaý bildiripti. Osydan soń-aq ár jerde ártúrli aıtylyp, úmitti tumshalaǵan kúdik bulty seıilip shyǵa keldi. Iske qulshyna kiristik. Joqtan bar jasaý demekshi, eshnárse ońaı bolǵan joq. Baza retinde Aqtaý qalasyn tańdap, qaladan ǵımarat taýyp, jańa qurylymdy ornalastyra bastadyq. Jergilikti ákimshilik ókilderi jyly qarsy alyp, múm­kindiginshe kómektesip otyrdy. Biz aldymen Kaspıı teńiziniń qazaqstandyq sektoryn kúzetetin teńiz jaǵalaýy patrýldik qyzmetin qurdyq. Ol qaraqanattanyp, topshysy qataıǵan soń teńiz aıdynyna shyǵatyn flotılııany, sosyn áskerı-teńiz flotyn aıaǵynan qaz-qaz turǵyzdyq. Endi aldymyzda kemeler, mamandar tabý máselesi turdy. Áńgime istiń yńǵaıyn taba bilýde ǵoı, bul sharýa­lar qıyn da bolsa, sol kezderi ońynan oralǵanyna qazir shúkirshilik etemiz.

Mundaı isterge aldymen Ke­ńes Odaǵy kezinde Áskerı-teńiz kúsh­terinde qyzmet etip tájirıbe jınaqtaǵan, sondaı-aq osy salada áskerı bilim alǵan mamandardy, ofıserlerdi tarta bastadyq. Ke­ıin ózimizdiń tól mamandarymyzdy daıyndaý qajettiginen Aqtaýda Áskerı-teńiz ýchılıshesin ashtyq, eki jyldan soń ol oqý orny ınstıtýt deńgeıine kóterildi. Isti úılestirip otyrý úshin Qorǵanys mınıstrligi Ortalyq apparaty janynan arnaıy bólimshe, artynsha Aqtaýda áskerı-teńiz bazasy ómirge keldi. 1995 jyly Mańǵystaý oblysynyń Túpqaraǵan aýdany aımaǵyndaǵy Baýtıno portynda AQSh-tan ákelingen 6 kater, Germanııadan jetkizilgen 4 shaǵyn kúzet kemesi sýǵa túsirildi. Oraldaǵy «Zenıt» zaýyty otandyq kemelerdi qurastyrýǵa kiristi. Nátıjesinde kóp uzamaı qatarymyzdy qazaq­standyq alǵashqy «Suńqar» kúzet kemesi, sál keıinirek «Batyr» kemesi tolyqtyrdy. Ýaqyt óte kele Áskerı-teńiz kúshteriniń qurylymynda ózgerister bolyp otyrdy. Biraq qalaı bolǵanda da eń basty mindet – jas memleketimizdiń jas flotılııa­syn aıaǵynan tik turǵyzý bolatyn. Osylaısha, tynymsyz eńbek, mazasyz kúnderdiń jemisi dep aıtýǵa bolady, 1998 jyly elimizdiń Áskerı-teńiz kúshteriniń qurylǵanyna bes jyl tolǵan mereıli sátke 500 ofıser, starshına jáne matrosy bar, 17 kemesi men kateri bar qurammen jettik. Bul az eńbek pe, kóp eńbek pe, ózderińiz baǵamdaı berińizder.

– Jas qurylym úshin az dep aıta almaımyz. Jańa ǵana ózińiz sóz etkendeı, aldymen «qara­qanat­tanǵan» elimizdiń Áskerı-teńiz kúshteriniń bas-aıaǵy bes-aq jylda qanatyn qomdaýǵa jarap qalǵany tańǵaldyryp ári qýantyp otyr.

– Iá, munyń bári aıtýǵa ǵana ońaı. Qıyndyǵyn jarǵaq qulaq­tary jastyqqa tımeı, sol istiń aýyrtpalyǵyn kótergen meniń árip­testerim jaqsy biledi. Árbir kúnin teńizdeı týlaǵan oılarmen ótkizip, keı kezderi áp-ádemi ıdeıalary men isterin tolqyn basyp qalǵandaı jabyrqaýǵa tap bolǵan shaqtary az emes olardyń.

Bes jylda joǵarydaǵydaı jetistikke qalaı jettińizder dep otyrsyzdar ǵoı. Sizderdiń sura­ǵy­ńyzǵa jaýap bereıin, táýelsiz memleketimizdiń Áskerı-teńiz kúsh­terin qurýǵa Prezıdent Nursultan Nazarbaev zor qoldaý kórsetti. Osy oqıǵalardyń barlyǵyn kózben kórip, elimizdiń Qarýly Kúshterin, sonyń ishinde ózime etene Áskerı-teńiz kúshterin damytýǵa jasaǵan aıryqsha qamqor­lyǵyna kýá bolǵandyqtan, bul saladaǵy Elbasy eńbegin joǵary baǵalaımyn jáne Memleketimizdiń basshysy ári Joǵarǵy Bas qolbasshy retinde Nursultan Ábishulynyń esimin árdaıym qurmetpen ataımyn.

Elbasy Kaspıı teńizin tynysh­tyqtyń, dostyqtyń teńizi bolsyn degen ıdeıa usyndy. Qazaqstandyq aımaqty kúzete otyryp, biz óz tarapymyzdan kórshilermen tatý-tátti bolý ustanymyndamyz. 2012 jyly Memleket basshysy respýblıka Qorǵanys mınıstrliginiń keńeıtilgen alqa májilisinde 1-shi rangaly kapıtan Jandarbek Januzaqovqa Qazaqstan Áskerı-teńiz kúshteriniń Jaýyngerlik Týyn tapsyryp turyp: «Qurmetti generaldar men ofıserler, jaýyngerler! Búgin óte bir qýanyshty kún. Otanymyzdyń baıraǵy astynda ata-babalarymyz ár ýaqytta da ar-namyspen el qorǵap, týǵan jer úshin janyn pıda etken. Sondyqtan tapsyrylyp otyrǵan Jaýyngerlik týmen birge elimizdiń táýelsizdigin, jerimizdiń tutastyǵyn, halqymyzdyń tynysh­tyǵyn saqtaýǵa bizdiń generaldarymyz, ofıserlerimiz, sarbazdarymyz jan aıamaı qyzmet etedi dep senemin. Osy týdyń astynda bizdiń Otanymyz – Qazaqstan Respýblıkasyn qorǵaý úshin áskerı salanyń jetildiriletinine, tártiptiń nyǵaıatynyna senimdimin», dep Áskerı-teńiz kúshterin qurýdyń, damytýdyń mańyzy zor ekendigine toqtaldy. Budan Áskerı-teńiz kúshteriniń kúni búginge deıin Elbasynyń jiti nazarynda ekendigin bilýge bolady.

– Ratmır Álimhanuly! Pre­zıdent jáne Qarýly Kúsh­teri­mizdiń Joǵarǵy Bas qolbas­shy­sy retinde Nursultan Nazar­baev­tyń Áskerı-teńiz kúshterin qurý týraly Jarlyqqa qol qo­ıyp, salanyń aıaǵynan tik turyp ketýine qoldaý kórsetkenin joǵa­rydaǵy jandy mysaldarmen óte jaqsy baıandadyńyz. Al kún­delikti jumys barysynda, ıaǵnı Áskerı-teńiz kúshteriniń ishki áleminde ózińiz kórgen-bilgen, sezingen naqty qoldaý-qýattaýlar esińizde me? Mine, endi osyndaı jaıttardy ómirlik mysaldarmen aıtyp berseńiz...

– Qarýly Kúshterdi áýede, sýda jáne qurlyqta áreket ete alatyn úsh jaqty qurylym jasaý tapsyrmasy bizge úlken mindet júktedi. Memleket basshysy nusqaýymen Qarýly Kúshterge, onyń ishinde Áskerı-teńiz kúshterin nyǵaıtýǵa bólinetin qarjy kólemi jyl saıyn arttyryldy. Elbasy Aqtaýda shaǵyn Qorǵanys mınıstrligin qurǵysy keldi, osy maqsatta munda Áskerı-teńiz kúshteri, teńiz jaıaý áskerleri jáne Batys áskerı aımaǵy, avıasııalyq baza, Áskerı-teńiz ınstıtýty ómirden naqty kórinis tapty. Kaspıı teńizinen munaı ken oryndarynyń tabylýy jáne ony óndirýge qadam jasala bas­taýy bizge keme qurastyrý baǵdarlamasyn jasaý qajettigin uqtyrdy. Elbasy osynyń bárine zor qoldaý kórsetip otyrdy. Nursultan Ábishuly teńiz­shi bolmasa da, osy salany tabı­ǵı ıntýısııasymen jete biletin myqty strateg ekenin ańǵartty. Qazaqstan Prezıdentiniń atom qarýy­nan bas tartýy álem elderiniń yqylasyn týǵyzdy. Elbasymyz buǵan atom qarýyn qazaqstandyqtar qoldana almaıtyndyqtan nemese odan ári damyta almaıtyndyqtan emes, beıbitshilikti súıgendikten osy qadamǵa bardy. AQSh, Qytaı, Reseı sekildi alpaýyt eldermen dostyq qarym-qatynasty damytyp, óz táýelsizdigimizdi baıandy etý jolyndaǵy jansebil isterimen sarabdal saıasatker retinde tanylǵan Memleket basshysynyń Qazaqstanda Áskerı-teńiz kúshterin damytý, sý akvatorııasymen ótetin irgeni bekitý baǵytyndaǵy jumystary da kóńilge qonymdy. Men Aqtaý bazasynyń komandıri, respýblıka Áskerı-teńiz kúshteriniń qolbasshysy bolyp júrgen kezimde oǵan talaı ret kýá boldym. Elbasy teńizshilerge: «Sizderdi qalaı tamaqtandyrady? Kıimderińiz jyly ma, yńǵaıly ma? Qane, ne kıip júrsizder?» dep suraıtyn. Oqý bólmelerin, synyptardy aralap kórip, kazarmaǵa bas suqsa, tipti jýynatyn bólmedegi sý aǵatyn shúmekterdiń durys istep-istemeıtindigine deıin mán beretin. Bul qamqorlyq emes pe? Qarjy jetpeı qınalǵan sátterde: «Shydańdar, bári bolady», degeni áli esimizde. Qazir qarańyz, 20 jylda bizde materıaldyq jaǵdaı aıtarlyqtaı jaqsardy.

– Elbasymen kezdesken sátte­rińiz boldy ma?

– Nursultan Ábishuly Nazar­baevpen alǵash ret 1996 jyly Aqtaýda júzdestim. Jasalyp jatqan jumystar barysymen tanysqan Prezıdent maǵan: «Qane, 1-shi rangaly kapıtan myrza! Endi Tynyq muhıty, Sahalın araldary emes, myna óz teńizimizdi qolyńa al», dedi. Men árkez osy sózdiń údesinen shyǵýǵa umtyldym. Jańa qurylymnyń jańa bazasy maǵan amanat etilgendeı sezindim de sol amanatqa adal bolýǵa tyrystym. Elbasy bul saladaǵy eńbegimdi eskerip, 1998 jyly maǵan kontr-admıral ataǵyn berdi. О́stip, elimizdiń tuńǵysh ári alǵashqy osyndaı áskerı shendi adamy atandym.

Birde biz Elbasymen arnaıy issaparmen Kıevke bardyq. Túngi saǵat 2-3-ke deıin Nursultan Ábishulynyń bólmesiniń jaryǵy sónbedi. Sóıtsek, Ýkraına Rada­syndaǵy kezdesý úshin kitaphanadan sol eldiń kitaptaryn aldyryp, qajetti sóz­derdi, maqal-mátelderdi, derekterdi er­teńgi júzdesýde paıdalaný úshin túrtip alyp otyrypty. Qanshama kómekshisi, nesheme keńesshisi bolsa da, jumysynyń aýyrlyǵyna qaramaı, uıyqtamastan túni boıy izdený, kitapqa úńilý degen keremet tabandylyq qoı! Men, mine, osyny kórdim.

Nursultan Ábishulynyń Qazaq­stanǵa, Qarýly Kúshterge, Áskerı-teńiz kúshterine jasaǵan qoldaýyn bir suhbatta túgel aıtyp bere almaspyn. Qaıtalap aıtatynym, Áskerı-teńiz kúshterimizdegi qol jetken jetistikterdiń, jasalǵan árbir isterdiń bastaýynda Elbasy turǵandyǵy anyq. Osy salanyń qalyptasyp-damýyna tikeleı qol­daýy óte kóp boldy.

Men Nursultan Ábishulyn Pre­zıdent retinde, Qarýly Kúshterdiń Joǵarǵy Bas qolbasshysy retinde ǵana emes, azamat retinde qatty qurmetteımin. «Áý demeıtin qa­zaq joq», degendeı, osy oraıda ońashada qoıyn dápterime túsiretin azyn-aýlaq óleńderimniń ishindegi Elbasyna arnalǵan shýmaqtarymdy oqyp bergim kelip otyr.

«Bogom dannyı lıýdıam nashım, Syn naroda – Nýrsýltan. V trýdnyı chas straný vozglavıl, Sýverennyı Kazahstan. Bylo trýdno – Soıýz raspalsıa, Poterıalıs svıazı vse. Ekonomıka ýpala, Dengı stalı ne v sene. I nıkto togda ne dýmal, Prezıdentom daje stat. Ochen trýdno togda bylo, Vsıý straný v rýkah derjat. Intýısııa ı razým, Opyt jıznı, znanııa. Pomogaıýt Vam trýdıtsıa, I daıýt prıznanıe. I v poslanıı narodý, Verte mne, skazalı Vy. Chto zadýmal, to ıspolnıý, Iа derjý slova svoı. My vam verım, vy prımer nam, Kak rabotat, kak slýjıt. Dorojıt svoım narodom, I lıýdeı svoıh lıýbıt».

– Elimizdiń Áskerı-teńiz kúsh­teriniń qury­lý, qalyp­ta­ýyn­daǵy qıly kezeń­derine toq­taldyńyz. Endi siz my­na­ny aı­tyńyzshy, Áske­rı-teńiz kúsh­terimizdiń qazirgi áleýeti qandaı? Sosyn, sóz sońynda ózderińizdiń tól vedomstvolaryńyz – Ádilbek Jaq­sybekov jetekshilik etetin Qorǵanys mınıstrliginiń búgingi dáreje, deńgeıi týraly da aıta ketseńiz.

– Qudaıǵa shúkir, Áskerı-teńiz kúsh­terimiz damý ústinde. Az ǵana tarı­hynyń ishinde bul qurylym Volga, Don ózenderine, Mármár, Azov, Kaspıı teńizderine, Sımlıansk sý qoımasyna, Bosfor, Kerch buǵaz­daryna izin tas­tap,Túrkııa, Reseı, Ýkraına elderiniń sý joldaryn kesip ótti. Bul – aıtýǵa turarlyq jetistik. Qazirgi Áskerı-teńiz kúsh­teriniń damýynda mamandar daıyndaý, zamanaýı qarý-jaraqpen qamtý baǵytyna, sondaı-aq salany jappaı damytýǵa basymdyq berilgen. Kadrlar AQSh, Reseı, Túrkııa, Qy­taı, taǵy basqa iri elderde kelisim-shart negizinde daıyndalady. Son­daı-aq áskerı teńizshilerimiz Túrkııa, Koreıa, Germanııa, Pákstan, Reseı, Ázerbaıjan memleketterinde bilim­derin jetildirip, tájirıbe shyń­daıdy. Al qarý-jaraq degende, otandyq keme qurastyrý isi jolǵa qoıylyp, órkendep kele jatqandyǵyn aldymen aıtýymyz qajet. Respýblıka Qorǵanys mınıstrliginiń tapsyrysyna oraı, Oraldaǵy «Zenıt» zaýytynda ás­kerı kemeler jasalýda. Qazirgi tańǵa deıin bul jerden otandyq birneshe kemeler men katerler kók teńizge joldama aldy. Qaı iske de jańashyldyq, táýekelshildik kerek desek, sońǵy kezderi «Zenıt­tiń» iri syıymdylyqtaǵy, zama­naýı turǵyda jabdyqtalǵan zy­myrandyq-artıllerııalyq kemeler, kóp maqsattaǵy korablder jasaı bastaýy kóńil qýan­tady.

Al Qorǵanys mınıstrligine keler bolsaq, bul vedomstvodaǵy qol jetken erekshe jetistikter my­na­lar der edim. Birinshi – áskerı kadrlarymyzdyń álemniń kóptegen elin­de daıyndalýy. Bul – úlken eńbek, uıymdastyrý jumysyndaǵy eren iskerlik. О́ıtkeni, kásibı bi­lik pen mashyqty jetildirýde otan­dyq tájirıbeni sheteldik ozyq ádispen ushtastyra júrgizý – bizdiń áskerılerimizdiń ámbebaptyǵyn arttyratyn birden-bir taptyrmas jol. Ekinshi – Qazaqstan áskerıleriniń halyqaralyq jattyǵýlarǵa belsendi qatysa bastaýy jáne olardy óz elimizde batyl túrde uıymdastyra bilýi. Muny kez kelgen el isteı al­maıdy. Mysaly, Qyrǵyzstan áskerı-jattyǵýǵa qarjy tapshylyǵy saldarynan oǵan qol jetkize almaı otyr. Al bizdiń elimiz jyl saıyn ózimizdegi bes áskerı okrýgtegi jattyǵýlardy turaqty túrde ótki­zip qana qoımaı, 1994 jyldan «Or­tazbat» halyqaralyq oqý-jat­tyǵý­laryna, 1996 jyldan NATO-nyń «Beıbitshilik úshin seriktestik» baǵdarlamasy sheńberindegi synaq­tarǵa qatysyp keledi. Qazaqstan áskeri tarıhyndaǵy eń iri oqý-jattyǵýlardyń biri «Qalqan-2000» boldy jáne Ulybrıtanııa, AQSh Qarýly Kúshterimen birlesip ótip turatyn «Dala qyrany», UQShU sheńberindegi «Ile», «Shep», «Beıbit mıssııa» oqý-jattyǵýlary da tól áskerimizdiń tájirıbesin shyńdaı túsýde. Al úshinshi jetistigi retin­de Qorǵanys mınıstrliginiń áske­rılerge áleýmettik turǵydan jasap jatqan qoldaýyn aıtar edim. Ofıserlik quramǵa jyl saıyn turǵyn úı bólinip, kezekte turǵandar baspanaly bolýda. Jumysqa jańadan kelip, áli páterge qoly jetpegen jas kadrlar otbasylarynyń árbir múshesine sol ofıserdiń aılyq jalaqysynan tys 37 myń teńge kóleminde qosymsha materıaldyq kómek beriledi. Bul januıasynda 3 adamy bar áskerı úshin 111 myń teńge degen sóz. Ony ol aı saıyn jaldaǵan páterine tóleýine bolady. Sondaı-aq, qatardaǵy jaýyngerlerdiń tek jattyǵý, kúzet, oqý sııaqty taza ás­ke­rı qyzmetpen ǵana aınalysyp, burynǵy taptaýryn qalyptaǵy as­ha­­­­naǵa kezekshilikke baryp kartop tazalap, ydys jýýdan bosatylýy da tamasha múmkindik. Áskerı bólimderdegi sharýashylyq sııaqty qosalqy jumystarmen qazir jeke aýsorsıngter aınalysady. Mine, Qorǵanys mınıstrliginiń qazirgi jumysyn men óz basym osyndaı erekshelikter arqyly jaqsy baǵalaımyn.

– Áńgimeńizdiń sońyn elge, otandastarymyzǵa degen júrek­jar­dy oı-tilegińizben aıaqtasaq deımiz.

– Men qarbalasqa toly emes tynysh ómirdi tańdaǵan bolsam, Reseıde qalǵan bolar edim. О́z Otanyma eńbek etip, táýelsizdigimizdiń bekı túsýine perzenttik úlesimdi qosý úshin Qazaqstanǵa oraldym. Buǵan esh ókinbeımin, kerisinshe, kóńilimde qýanysh bar. Úlken be, kishi me – áıteýir bir sharýa bitirsem, elim úshin jasadym jáne Memleket basshysynyń qoldaýy arqasynda júzege asyrdym. Sondyqtan Pre­zıdentke, Qorǵanys mınıstrligi bas­shylyǵyndaǵy azamattarǵa, ózimmen úzeńgi qaǵystyra qatar júrgen áriptes-zamandastaryma alǵysym sheksiz. Teńizdegi áskerı qyzmet merzimim aıaqtalmaı turyp, týǵan elime qyzmet etýge úlgergenime shúkirshilik etemin. Áskerı Jar­ǵydaǵy tártipke saı jasymnyń kelýine baılanysty otstavkaǵa shyq­tym. Qazir teńizdegi ken oryndaryna jaǵadan qoldaý, servıstik qyzmet kórsetetin Baýtıno porty úshin kemeler jóndeýmen aınalysatyn Aqtaýdaǵy «Keme jóndeý» zaýyty AQ bas dırektory bolyp qyzmet etip júrmin. Qaıda júrip, qandaı jumys istesek te egemen elimiz da­mı bersin degen jalǵyz tilek alǵa jetelep otyrady.

Áńgimeleskender

Janbolat AÝPBAEV,

Gúlaıym ShYNTEMIRQYZY,

«Egemen Qazaqstan».

AQTAÝ.