Qarýly Kúshterdegi jańa oqý jyly "Uly dala áskeri – Táýelsizdik tiregi!" uranymen ótedi. Áskerı bólimder men mekemelerdiń birinshi basshylary ótkizgen memlekettik-quqyqtyq daıyndyq jańa oqý kezeńiniń alǵashqy sabaǵy boldy, dep habarlaıdy Egemen.kz Qorǵanys mınıstrliginiń baspasóz qyzmetine silteme jasap.
Barlyq sanattaǵy áskerı qyzmetshilerge armııanyń ótken jyldyq qorytyndylary men jetistikteri jetkizildi, sondaı-aq jańa oqý jylyna mindetter qoıyldy. Olardyń arasynda áskerlerdiń joǵary jaýyngerlik ázirligin qoldaý, jaýyngerlik daıarlyq pen jeke quramnyń dalalyq daǵdysyn jetildirý, bitimgershilik qyzmetti qamtamasyz etý, áskerı qyzmetshilerdiń moraldyq-psıhologııalyq jaı-kúıin nyǵaıtý jáne basqa da birqatar áleýmettik aspektiler boıynsha máseleler bar.
Apta boıy barlyq áskerı bólimder men mekemelerde ótkiziletin taktıkalyq-arnaıy sabaqtar aqparattandyrý júıesiniń sapasyn, shtabtardyń úılesimdi jumysyn tekserýge, basqarý organdarynyń, quramalar men áskerı bólimderdiń ózara is-qımyl deńgeıin jetildirýge baǵyttalady.
Qarýly Kúshterdiń basshylyǵy oqý jylynyń bastalýynda barlyq máselelerdi tolyq pysyqtaý qajettigi týraly nusqaýlar berdi. Pandemııamen jáne karantındik is-sharalarmen baılanysty shekteýler jaǵdaıynda bólimshelerdiń qyzmetine basa nazar aýdarý kerek.