Iman uıalaǵan aýyl

Aýyl aqsaqaldary keńese kele, bos turǵan bir úıdi meshit etip qaıta jab­dyqtaýdy qolǵa aldy. Tóbesine kóztar­tarlyqtaı etip kúmbez ornatyldy. Ishki bólmeleri jamaǵat jınalǵanda namaz oqýǵa, janaza shyǵarýǵa laıyqtalyp qaıta bólindi. Basqasha múmkindik bolmaǵan soń osylaı lajdaǵan. Al meshit óte qajet edi. Burynnan yntymaǵy bekem, bura tartar tentek-telisi, ala jipten attaıtyn sýyq qoldylary da joq aýyl turǵyndary sha­rapaty mol ımanǵa uıysa, birlik búgin­giden de bekem bola túser edi.

2012 jyly aýyl ımamy Saty­baldy Ábdirashuly el aqsaqal­dary­men jańa istiń jaı-japsaryn sana­larymen sal­maqtap, egjeı-teg­jeı­li keńese kele, jańa meshittiń qury­lysyn bastaýǵa bel býdy. El erteńin oılaǵan uıymshyl jurt bir­den kelise ketti. Osy aýyldan túlep ush­qan, tep­ken tasy órge domalap turǵan ká­sip­k­erler de qoldady. Sóıtip, 2013 jy­ly jańa meshittiń qurylysy bas­taldy. Qurylys jumystaryn uıym­dastyrýǵa el­ge janashyrlyǵy mol Nurlan Ybyraev, Mútálap Ju­manbaev, Baltash Qosybaev, Ermek Bek­baev tárizdi azamattar kóp eńbek sińirdi.

Máseleniń bárin qarjy sheshe­tini bel­gili. Bul tarapta da asa kóp qıyndyq bola qoıǵan joq. Japa­rovtar men Mer­genbaevtar áýletteri já­ne osy aýyldyń perzentteri Baýyr­jan Elýbaev, Myr­zabaı Ábdi­halyqov syndy azamattar qomaqty qar­jy bóldi. Qalǵanyn aýyl turǵyn­darynyń ózderi kóterdi. Osyndaı yntymaqtyń nátıjesinde 10 mln teńge kóleminde qarajat jınaldy.

Ortaq iske aýyl týmasy, «Azııa Fıltr» seriktestiginiń basshysy In­dıra Ybyraeva 2 mln teńge kó­leminde kó­mek kórsetip, aýyl azamattary taıly-taıaǵymen túgel jınalyp, jańa meshittiń shatyryn jaýyp, alystan kóz tartatyn kórnekti kúmbez ornatty. Bıyl jazda osy aýyl­dan túlep ushqan túlekter arasynda ótken «Jaqsylyq jasaýdan jarysaıyq» estafetasyna qatysýshy Jomart Bal­tashev pen Baýyrjan Ábdihalyqov basta­ǵan azamattar 800 myń teńge qarajat jı­nap, jańa meshitke sý qubyryn tartyp, ishine jyly eden ornatyp, jóndeý jumystaryn tap-tuınaqtaı etip jasap berdi.

Qazir aýyldaǵy eńsesi bıik qul­shylyq úıi ımandylyq uıyǵan aýyl­dyń rýhanı baılyǵyn eseleý­ge septigin tıgizip tur. Bul da – el bir­ligin oılaǵan, jaqynyna ja­nashyr bola alatyn jamaǵattyń óne­geli isi.

Aqmola oblysy,

Býrabaı aýdany