Astrahan aýdanynda kásibin endi bastaǵandar memleket tarapynan 130 mln teńge kóleminde granttar men jeńildetilgen nesıe alyp otyr. Bul «Nátıjeli jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan «Eńbek» baǵdarlamasyn iske asyrýdyń nátıjesi. Búgingi tańda memlekettiń qoldaýyna ıe bolǵandar óz isin damytyp, keńeıtýge múmkindikteri jetkilikti, dep habarlaıdy Egemen.kz.
«Eńbek» – baǵdarlamasynyń aýqymy keń. Bir sózben aıtqanda, oqyp, biliktiligin arttyryp, óz kásibin ashqysy kelgenderge taptyrmas múmkindik. Astrahan aýdany boıynsha bes jyldyq jobaǵa 692 adam qatysty. Bıyldyń ózinde 15 adam qysqamerzimdi kásiptik oqýdan ótti. 200 aılyq eseptik kórsetkish mólsherinde 30 memlekettik grant berildi. Isin jańa bastaǵan 34 kásipker jalpy quny 130 mln teńgege jýyq nesıe alǵan.
"2020 jyly 555 myń teńge kóleminde grant aldym. Buǵan óte qýanyshtymyn. Ázirge eki bas iri qara ustaımyn. Qazirdiń ózinde onyń paıdasyn aqyryndap kórip jatyrmyn. Sút ónimderi men maı satamyn. Jaqyn arada tóldeıdi, sóıtip mal basy taǵy da kóbeıedi. Meniń endigi maqsatym – shaǵyn nesıe alyp, mal basyn kóbeıtý. Sút ónimderiniń kólemin ulǵaıtsam degen oıym bar", – deıdi kásipker Jaınagúl Baıtaza.
«Eńbek» baǵdarlamasynyń úshinshi baǵyty boıynsha qoǵamdyq jumystarǵa 190 adam tartyldy. Jańa mamandyq alyp, jumys tapqysy kelgen 45 jumyssyz jastar tájirıbesine jiberildi. Jumyspen qamtý ortalyǵy mamandarynyń aıtýynsha, jospar 100 prosentke oryndaldy.