Petropavl qalasyynń 19-shaǵynaýdanynda ornalasqan qazaq mektep-gımnazııasyna uly Abaıdyń esimi berildi. Osyǵan oraı Premer-Mınıstr Asqar Mamın keshe Úkimet qaýlysyna qol qoıǵan edi, dep habarlaıdy Egemen.kz
Abaı atyndaǵy qazaq mektep-gımnazııasy 2007 jyly boı kóterdi. 1100 balaǵa shaqtalǵan bilim ordasynda búginde 1046 oqýshy oqıdy. Sonymen birge daıarlyq synyptarymen qatar, 50 balaǵa shaqtalǵan shaǵyn ortalyq jumys isteıdi. Mektepke Abaı esiminiń berilýine baılanysty oqý baǵdarlamasyna da biraz ózgeris engiziledi.
Abaı atyndaǵy qazaq mektep-gımnazııasynyń dırektory Bulbul Ahmadıqyzy: "Biz bul habardy bir jylǵa tarta kúttik. Pandemııaǵa baılanysty sozylyp ketti. Respýblıkadaǵy Abaı mektepteriniń jelisine kirip otyrǵan 17-shi mekteppiz. Abaı esiminiń berilýi bizge zor jaýapkershilik artady. Árıne, qazaq tili men ádebıetin tereńdete oqytatyn bolamyz. Qazir bul pánderge aptasyna 3 saǵat qana berilse, ony jańa oqý jylynda eki ese arttyramyz", deıdi ol.
Bıyl sáýir aıynda mektep qabyrǵasynda Abaı ortalyǵy ashyldy. Ol 6 bólimnen turady. Munda qazaqtyń mádenıetin dáripteıtin mýzeı ashylǵan. Ortalyqta mamandar daryndy balalarmen jumys isteıdi. Sondaı-aq, QR-kody bar arnaıy stend arqyly elimizdegi Abaı murajaılarymen tanysýǵa bolady. SQO Bilim basqarmasynyń málimetinshe, bıyl óńirde taǵy eki mekteptiń ataýy ózgerdi. Býlaev qalasyndaǵy №4 orta mektepke Maǵjan Jumabaevtyń esimi berilse, Jambyl aýdany Presnovka eldimekenindegi jalpy bilim beretin orta mektep endi Qojabergen jyraý esimimen atalady.