Qostanaı oblysynda qylmys deńgeıi úsh ese azaıdy. Bul týraly aımaq turǵyndarymen áleýmettik jelide onlaın rejimde kezdesken Qostanaı oblysy polsııa departamentiniń bastyǵy Beket Aıtmaǵambetov aıtty, dep habarlaıdy Egemen.kz.
"Bıyl qylmystyń negizgi túrleri deńgeıiniń turaqty tómendeýi baıqalady. Olardyń qatarynda kisi óltirý, densaýlyqqa aýyr zııan keltirý, zorlyq, qaraqshylyq, tonaý, urlyq, alaıaqtyq, buzaqylyq jáne kólik urlyǵy sııaqty qylmys túri bar", - dedi departament basshysy.
Aımaqta mal urlyǵynyń deńgeıi 30%-ǵa azaıǵan. Oblysta bıyl tirkelgen 189 mal urlyǵynyń 150-ge jýyǵy óriste qaraýsyz júrgen malǵa qatysty jasalǵan.
Beket Aımaǵambetov páter tonaý qylmysynyń deńgeıi 45%-ǵa tómendegenin aıtty. Sonymen qatar buryn sottalǵan adamdar jasaǵan qylmystardy edáýir azaıǵany baıqalady. Jasóspirimder qylmysy men balalarǵa qatysty qylmystardyń da deńgeıi tómendegen. Al qoǵamdyq oryndarda jáne kóshelerde jasalǵan qylmystar 40%-ǵa azaıyp otyr.
"Munyń barlyǵy tıimdi júrgizilip jatqan qylmystyń aldyn alý sharalaryna tikeleı baılanysty. Birneshe jyldan beri oblysta turǵyn úılerdiń aýlalarynda jaıaý patrýldeý tájirıbesi jalǵasýda. Bıyl qylmystyń kóptegen túri, sonyń ishinde múlik urlyǵyna qatysty qylmystardyń ashylý deńgeıi jaqsardy. Asa aýyr qylmys túrleriniń ashylý deńgeıi de artty", - dedi Beket Aımaǵambetov.
Sonymen qatar bıyl oblysta oryn alǵan qaraqshylyq, bopsalaý, buzaqylyq, jas balalardy azǵyndyqqa ıtermeleý, kólik urlaý qylmystary tolyq ashyldy.