Keshe Premer-Mınıstr Serik Ahmetov Astana qalasyndaǵy Mamandandyrylǵan halyqqa qyzmet kórsetý ortalyǵynda boldy. Bul ortalyq Memleket basshysynyń tapsyrmasyna oraı qyrkúıek aıynda qanatqaqty rejimde iske qosylǵan edi.
Keshe Premer-Mınıstr Serik Ahmetov Astana qalasyndaǵy Mamandandyrylǵan halyqqa qyzmet kórsetý ortalyǵynda boldy. Bul ortalyq Memleket basshysynyń tapsyrmasyna oraı qyrkúıek aıynda qanatqaqty rejimde iske qosylǵan edi.
Mamandandyrylǵan keshendi ortalyqta Úkimet basshysyn Kólik jáne kommýnıkasııa mınıstri A.Jumaǵalıev, Ishki ister mınıstri Q.Qasymov jáne Astana qalasynyń ákimi I.Tasmaǵambetov qarsy alyp, ortalyqtyń qyzmetimen jáne aýladaǵy jeńil jáne aýyr júk kólikterin tekserýden ótkerýge arnalǵan eki birdeı ańǵarmen, sondaı-aq, kólikti júrgizip kórýge jasalǵan avtodrommen tanystyrdy. S.Ahmetov keshendi aralap, ondaǵy ınspektorlardyń qyzmetin óz kózimen kórdi.
Ortalyq bir kúnde 600-den 1200 adamǵa deıin qyzmet kórsete alady. Onyń jalpy aýmaǵy 2770 sharshy metr jerdi alyp jatyr. Keshendi qyzmet kórsetý ornynda avtokólik quraldary tirkeledi jáne júrgizýshi kýálikteri beriledi. Astanalyqtar osy ortalyqta avtokólikti júrgizý quqyǵyna emtıhan tapsyryp, ony eki saǵat kóleminde alyp úlgeredi. Al avtokóligińizdi Astana qalasyna tirketýge bar-joǵy bir jarym saǵat qana ýaqyt kerek. Osy qyzmetterdi jedeldetý maqsatynda bıznes úderisterdiń avtomattandyrylýy nátıjesinde derekter qory jáne memlekettik organdardyń aqparattyq júıeleri osy ortalyqqa shoǵyrlandyrylǵan.
Ortalyq qyzmetkerleriniń aıtýyna qaraǵanda, osy qyzmetterdi kórsetýge burynǵy kezde alty saǵattaı, tipti, keıde odan da kóp ýaqyt ketetin. Al qazirgi ýaqytqa deıin atalǵan keshendi ortalyqta 3700-ge jýyq júrgizýshi kýáligi berilip, 17 myńnan astam avtokólik quraldary tirkelip úlgeripti. Dál osyndaı Mamandandyrylǵan halyqqa qyzmet kórsetý ortalyǵy búgingi tańda Almaty, Qaraǵandy jáne Aqtaý qalalarynda jumys istep tur. Buıyrtsa, jyl sońyna deıin Taraz qalasyndaǵy bólim de óz qyzmetin bastaıtyn kórinedi.
Keshendi ortalyqpen tolyq tanysyp shyqqan Úkimet basshysy memlekettik tıisti organ qyzmetkerlerine birqatar tapsyrmalar júktedi.
Shara sońynda Kólik jáne kommýnıkasııa vıse-mınıstri S.Sársenov jýrnalısterdiń birqatar suraqtaryna jaýap berdi. «Memleket basshysynyń tapsyrmasymen qanatqaqty rejimde júzege asyrylǵan bul jobany Úkimet basshysy jaqsy baǵalady. Endi eldegi barlyq iri qalalarda osyndaı ortalyqtar ashylyp, halyqqa qyzmet kórsetetin bolady. Al Astana qalasyna osy bir keshendi ortalyq jetkilikti degen oıdamyz», dedi vıse-mınıstr. Ortalyqtyń nege qalanyń shalǵaı shetine oryn tepkeni týraly suraq qoıyldy. Onyń aıtýyna qaraǵanda, eger ortalyq elordanyń ortalyq aýdandaryna ornalasqanda, birinshiden, úlken jer kólemin alar edi. Ekinshiden, qala ishindegi avtokólik keptelekterin burynǵydan da kúrdelendire túsýi yqtımal eken.
Nurbaı ELMURATOV,
«Egemen Qazaqstan».