Qostanaı qalasyndaǵy «Iýbıleınyı» shaǵyn aýdanynda qazaq jáne orys tilinde bilim beretin 1200 oryndyq jańa mektep paıdalanýǵa berildi. Bilim ordasynyń ashylý saltanatyna aımaq basshysy Arhımed Muhambetov qatysty. Táýelsizdik qarsańynda esigin aıqara ashqan bilim ordasynda jalpy sany 49 synyp bar. Mektep dırektorynyń aıtýynsha, kelesi toqsannan bastap 830 bala osy mektepte bilim alatyn bolady.
1-11 synyptar aralyǵynda 770 oqýshy bar. Al mektepaldy daıarlyq synybyna qabyldanǵan 88 balanyń 17-si memlekettik tilde oqýǵa ótinish berdi. Qazir 76 muǵalim bar. Olardyń deni joǵarǵy jáne birinshi sanattaǵy ustazdar. Muǵalimderdi jumysqa qabyldaý barysynda biz birinshi kezekte osy shaǵyn aýdanda turatyn mamandarǵa kóńil bóldik. Mektep muǵalimderi 3-toqsannan bastap jumysqa kirisedi, dedi mektep dırektory Baqytjan Isetova.
«Iýbıleınyı» - Qostanaıdaǵy eń jańa shaǵyn aýdan. Jańa mekende ashylǵan jańa mektep - eń aldymen osy tóńirektegi turǵyndardyń qýanyshy.
- Bul shaǵyn aýdanǵy bıyl ǵana qonys aýdardyq. Eki balam bar, úlkeni - 11, kishisi – 5-synypta. Kenje ulym buǵan deıin №1-mektep-gımnazııada oqyǵan. Mektep alys bolǵandyqtan, kúndelikti joldan qınaldyq. Endi úıdiń qasynan jańa bilim ordasy ashylyp, kenjemizdi osy mektepke qýana berip otyrǵan jaıymyz bar. Bizge óte yńǵaıly. Mynadaı keń ári sáýletti mektepte oqyǵany bizge de jaqsy. Osy shaǵyn aýdanda turatyn ata-analardyń bári qýanyshty, - deıdi «Iýbıleınyı» shaǵyn aýdanynyń turǵyny Mánshúk Alǵashbaeva.
Jańa bilim ordasynda múmkindigi shekteýli balalarǵa ınklıýzıvti bilim berý múmkindikteri qarastyrylǵan. Mektep aýlasynda oıyn jáne demalys alańdary bar. Sonymen qatar, balalar jemis-jıdek, gúl, túrli daqyldar egip, seleksııa jumysymen aınalysatyn oqý-tájirıbelik aımaq qarastyrylǵan.
Qostanaı oblysy