Kýrortty aımaqtyń kórki kelispek

Keler jazda birneshe jańa týrıstik nysan qyzmetin bastaıdy dep kútilýde. Áýeli aýmaǵy at shaptyrym, qasıetti Abylaı han alańynda el tarıhyn ekshep, qolmen qoıǵandaı etip baıandaıtyn kórnekti kórme ashylmaq. Alańda aıbarly handar men el qorǵaǵan batyrlardyń máńgi ólmes izi jatyr. Erlik soraby el esinen esh ýaqytta óshpeýi kerek. Sondyqtan, bul oraıda mýltımedıaly-ınteraktıvti parktiń ashylýy san sanany silke jańǵyrtyp, ótkenniń ońdy isin eske salady dep kútilýde. Jobanyń jalpy quny 4,2 mlrd teńgeni quraıdy. Aldaǵy jazda paıdalanýǵa berilmek.

Talaıdy tamsandyrar qýaty bar Aqbýra kesheniniń qurylysy jalǵasýda. Bir ereksheligi, bul nysan shveısarııalyq týrıstik tájirıbeni negizge alyp otyr. Tabıǵı kórki álemniń kez kelgen jerindegi sulýlyqpen tarazy basyna túse alatyn bul ólke úzdik tájirıbeni ushtastyrsa, baǵy janyp, baǵasy arta túseri sózsiz. Demalys ornynyń alǵashqy kezeńi jazǵy týrızm kezinde paıdalanýǵa berilse, jobanyń tııanaqty atqarylyp, tórtinshi kezeńin júzege asyrý birneshe jylǵa sozylýy ábden múmkin. Keshen aýmaǵy Úlken Shabaqty men Teke kóliniń jaǵalaýlaryndaǵy 230 gektardan astam jerdi alyp jatyr. Bir-birine maǵyna ústemeleıtin tórt kezeńnen turady. Eń bas­tysy, atalmysh nysan tolyq qýatyna engen kezde jańadan úsh myń jumys orny ashylmaq. Alaqandaı aýdan halqy úshin tamasha olja.

– Qazirden bastap bul nysandy bilikti mamandarmen qamtý máselesin de egjeı-tegjeıli oılastyrýdamyz, – deıdi «AQBURA DEVELOPMENT» seriktestiginiń dırektory Sapar Begaıdarov, – Shveısarııadan arnaıy kompanııa ókilderi kelip kásibı bilim bermek.

Ázirge demalys ornyna 4 mlrd teńge kóleminde ınves­tı­sııa quıylǵan. Alǵashqy kezeńde táýligine 200 dema­lý­shyǵa deıin qabyldaýǵa múm­kindigi bar. Joba jetekshisi Sapar Begaıdarovtyń aıtýyna qaraǵanda, nysannyń kelesi damý kezeńderine qarjy salýǵa yntaly ınvestorlar az emes eken. Demek, Býrabaı baýraıy burynǵy keıpinen de kórkeıe túsýi ábden múmkin.   

Aqmola oblysy,

Býrabaı aýdany