Jýyrda «HabarShow» Youtube kanalynda jáne «Habar» telearnasynyń efırinde jas daryn, elimizdiń maqtanyshy Erjan Maksımniń jańa ánine taspalanǵan «Qazaqtyń uldary» atty beınebaıannyń tusaýkeseri ótti.
«Habar» agenttiginiń Táýelsizdik kúnine tartý etip, el namysyn qorǵap júrgen aıtýly azamattardyń qurmetine arnalǵan merekelik klıpin kórermender óte jyly qabyldaýda.
Beınebaıan Almaty qalasyndaǵy Qazaqfılm kınostýdııasynda túsirilgen. «Qazaqtyń uldary» dep atalatyn ánniń sózin aqyn Rahat Ábdirahmanov, al mýzykasyn Erbolat Dosbolatuly jazǵan.
Maksım týraly kóziqaraqty kórermen qaýym jaqsy bilýi tıis. Jas óren byltyrǵy ótken «Junior Eurovision-2019» halyqaralyq án baıqaýynda Qazaqstannyń namysyn qorǵap, ekinshi oryn ıemdengen bolatyn. «Bul klıp mereke qarsańynda jaqsy tartý boldy dep oılaımyn. О́ıtkeni bul óleń de, beınebaıan da qazaq tarlandaryna arnalǵan. Beıbit elimizdiń búgingi batyrlaryna kórsetilgen qurmet. Biz óz tarapymyzdan Erjan Maksımdi qoldaý maqsatynda osyndaı beınematerıaldy túsirýdi jón sanadyq», dedi «Habar» telearnasynyń dırektory Dınara Bısembına.
Klıpke Olımpıada chempıony Ermahan Ibraımov, kásibı boksshy Janqosh Turarov bastaǵan sportshylar men bir top ánshi túsken. Rejısseri – Nurserik Qambar. Tyń týyndy týraly Maksımniń ózi: «Qazaqtyń jigitteri bir-birin qoldap júrsin degen nıetpen osy ándi shyǵardyq. Túsirilim barysy óte keremet ótti. О́zimizge qatty unady jáne de klıp óte qyzyq boldy. Árqashan elimiz aman, jurtymyz tynysh bolsyn», dep rızashylyq bildirýde.