Tuńǵysh Prezıdent N.Nazarbaevtyń bastamasymen qolǵa alynǵan «Qamqorlyq» jobasy aıasynda Rýdnyı qalasynda paıdalanýǵa berilgen ońaltý ortalyǵynyń ashylý rásiminde oblys ákimi Arhımed Muhambetov Qostanaıdaǵy Nazarbaev zııatkerlik mektebiniń oqýshysy Sofııa Sınısınaǵa «Elbasy medalin» tapsyrdy.
6 jasynan shahmatpen aınalysatyn Sofııa birneshe jyl qatarynan oblystyq jáne qalalyq jarystarda júldeli oryndarǵa ıe bolyp júr. Sofııanyń ádebıet pen ónerge de talaby zor. Osydan eki jyl buryn «Altyn medal – 2018» halyqaralyq konkýrsynyń jeńimpazy atanǵan ol bıyl Abaı Qunanbaıulynyń 150 jyldyǵyna arnalǵan respýblıkalyq baıqaýǵa qatysyp, mánerlep oqýdan 1-oryndy jeńip aldy. Sofııa sonymen qatar matematıka men orys tili pánderinen qalalyq olımpıadalardyń jeńimpazy. Bul az deseńiz, jas sýretshilerge arnalǵan konkýrstardan marapattary taǵy bar.
– «Elbasy medali» jobasy ózim sııaqty talapty jastardyń jan-jaqty damýyna múmkindik beredi. Mysaly, men atalǵan joba arqyly volonterliktiń jastarǵa qanat bitiretin qoǵamǵa asa paıdaly qozǵalys ekenin túsindim. Sondaı-aq eskiden qalǵan tarıhı jádigerlerdiń biz úshin qanshalyqty mańyzdy ekenine kóz jetkizdim. Elbasynyń tikeleı qamqorlyǵymen júzege asyrylyp jatqan ıgi jobanyń jastarǵa bereri mol, – deıdi Sofııa.
Úılestirýshilerdiń aıtýynsha, «Elbasy medali» – jastardy keshendi damytýǵa baǵyttalǵan ulttyq deńgeıdegi jalǵyz baǵdarlama. 14-29 jas aralyǵyndaǵy jastarǵa arnalǵan baǵdarlama sport, daryn men daǵdy, kitap oqý, ulttyq mura, volonterlik, ekspedısııalar men joryqtar, eńbek praktıkasy sııaqty 7 negizgi baǵyttan turady.
2020 jyly «Elbasy medali» baǵdarlamasy 11 myńnan astam qatysýshyny, 600 tálimgerdi, 17 aımaqtyq úılestirýshiler men sarapshylardy qamtyǵan. «Elbasy medaliniń» ıegerleri bilim granttaryn taǵaıyndaý kezinde zańnamada belgilengen tártippen artyqshylyqqa ıe bolmaq.