Senat Spıkeri Máýlen Áshimbaevtyń tóraǵalyǵymen Palata otyrysy ótti, dep habarlaıdy Egemen.kz
Memleket basshysy bıylǵy Joldaýynda buqaralyq sportqa jáne dene tárbıesine basymdyq berý qajet ekenin erekshe atap ótken bolatyn. Soǵan sáıkes depýtattar búgingi otyrys barysynda «Mádenıet, dene shynyqtyrý jáne sport máseleleri boıynsha keıbir zańnamalyq aktilerge ózgerister men tolyqtyrýlar engizý týraly» zań qabyldady.
«Bul zań balalardyń jan-jaqty damýyna yqpal etetin sport jáne shyǵarmashylyq baǵyttaǵy memlekettik tapsyrystardy tıimdi uıymdastyrýǵa múmkindik beredi. Budan bylaı memleket qarjylandyratyn sporttyq jáne shyǵarmashylyq úıirmeler memlekettik satyp alýdyń qorytyndysyna baılanysty emes, olardyń reıtıngine, sondaı-aq, halyqtyń suranysyna qaraı anyqtalady. Osy zańǵa múmkindigi shekteýli jandar úshin turǵylyqty jerde jáne demalys oryndarynda sportpen shuǵyldanýǵa jaǵdaı jasaý normalary da engizildi. Soǵan sáıkes bul jumys endi jergilikti atqarýshy organdardyń mindeti bolyp esepteledi. Sonymen qatar bul qujatta ulttyq sport túrlerin damytý, olardy jas býynǵa mektep kezinen bastap nasıhattaý máselelerine de erekshe nazar aýdarylǵan», dedi Máýlen Áshimbaev.Otyrys kezinde senatorlar «Tehnıkalyq retteý týraly» zańdy qabyldady. Bul qujat otandyq taýar óndirýshilerdiń básekelestik basymdyǵyn iske asyrýǵa arnalǵan. Sondaı-aq depýtattar «Tehnıkalyq retteý, kásipkerlik, memlekettik basqarý júıesin jetildirý jáne tólemder máseleleri boıynsha keıbir zańnamalyq aktilerge ózgerister men tolyqtyrýlar engizý týraly» zańdy eki oqylymda qarap, qabyldady.«Ishki naryqtyń qaýipsizdigin qamtamasyz etý úshin ulttyq sertıfıkattaý júıesin damytý qajet. Ulttyq standarttardyń bedeli men olarǵa degen senimdi arttyrý máselesi de mańyzdy. Búgin qabyldanǵan zańdar osy maqsattardy júzege asyrýǵa baǵyttalǵan. Olar tehnıkalyq retteý salasyndaǵy baqylaý-qadaǵalaý qyzmetiniń ashyqtyǵy men tıimdiligin qamtamasyz etedi. Sol arqyly ónimniń tıisti sapasyna jáne onyń tutynýshylar úshin qaýipsiz bolýyna yqpal etedi», dedi Senat Tóraǵasy.Odan bólek, Senat depýtattary «Kedendik retteý jáne kásipkerlik qyzmet máseleleri boıynsha keıbir zańnamalyq aktilerge ózgerister men tolyqtyrýlar engizý týraly» zańdy eki oqylymda qarap, qabyldady. Bul zańǵa Parlament depýtattary bastamashy bolǵanyn atap ótken jón. Senat Spıkeriniń aıtýynsha, qabyldanǵan zań kedendik rásimderdi ótkizý merzimderi men tártibin ońtaılandyrýǵa, kedendik retteýdi jetildirýge jáne bıznes ahýaldy jaqsartýǵa baǵyttalǵan.«Osy zań adamnyń qatysýyn barynsha azaıtyp, sybaılas jemqorlyq táýekelderin tómendetýge jáne qujat aınalymyn azaıtý úshin kedendik aqparattyq bazanyń qyzmeti men «Biryńǵaı tereze» júıesi jetildirýge múmkindik beredi. Sondaı-aq syrtqy ekonomıkalyq qyzmetke qatysýshylardyń ótinishterin qaraý jáne sol boıynsha sheshim qabyldaý merzimderin qysqartýǵa jaǵdaı jasaıdy. Sonymen qatar kameralyq jáne kóshpeli kedendik tekseris júrgizý rásimi qaıta qaralady. Aldaǵy ýaqytta zań kedendik retteýdi jetildirýge úlesin qosady dep senemiz», dedi Palata Spıkeri.Sonymen qatar búgin depýtattar «Qazaqstan Respýblıkasynyń Úkimeti men Birikken Arab Ámirlikteriniń Úkimeti arasyndaǵy Qazaqstan Respýblıkasynyń Birikken Arab Ámirlikterindegi Elshiliginiń jáne Birikken Arab Ámirlikteriniń Qazaqstan Respýblıkasyndaǵy Elshiliginiń qajettilikterine Astana qalasynda jáne Ábý Dabı qalasynda jer ýchaskelerin óteýsiz paıdalanýǵa ózara berý týraly kelisimdi ratıfıkasııalaý týraly» zańdy qabyldady.Al «Qoǵamdyq keńesterdiń qyzmeti máseleleri boıynsha keıbir zańnamalyq aktilerge ózgerister men tolyqtyrýlar engizý týraly» zań jobasyna senatorlar túzetýler engizip, Májiliske jiberdi.