26 jáne 27 jeltoqsan kúnderi saǵat 15.00-de «Habar» telearnasynda «Abaı joly» tarıhı serıalynyń tusaýkeseri bolady. Fılm qazaqtyń uly aqyny jáne aǵartýshysynyń 175 jyldyǵyna arnalǵan. Telehıkaıa 6 bólimnen turady jáne aqyn ómiriniń úsh kezeńin qamtıdy, dep habarlaıdy Egemen.kz.
«Serıalda úsh kezeńdegi oqıǵalar sýrettelgen. Túsirilim jumystary Almaty oblysynda jáne Semeı qalalarynda ótti. Kórermenderge bul serıal unaıtynyna senimdimin», - dedi joba prodıýseri Batyr Sazahanov.
Ssenarıı avtorlary - Murat Esjan, Ularbek Nurǵalymuly, Maqpal Madııarova. Ssenarııdiń keńesshi qazaq jazýshysy, dramatýrg, Qazaqstannyń eńbek sińirgen qaıratkeri - Roza Muqanova boldy. Joba dırektory - Murat Esjan.
Fılm Muhtar Áýezovtiń «Abaı joly» roman-epopeıasynyń qurylý tarıhyn kezeń-kezeńimen jańǵyrtý arqyly uly aqynnyń ómiri men shyǵarmashylyq erligin ashady. Muhtar Áýezov Abaı ómiri týraly negizgi ádebı shyǵarmaǵa jastaıynan kirisken. Keńes jazýshysy birneshe onjyldyqtar boıy myńdaǵan adamdardan aqyn týraly málimetter jınaǵan. Osy jyldary qazaq dalasynda aýyr saıası ózgerister oryn aldy. Stalındik qýǵyn-súrgin Muhtar Áýezovti de aınalyp ótken joq. Roman avtory birneshe ret túrmege jabyldy. Alaıda bul jaǵdaılar jazýshynyń «Álem ádebıeti kitaphanasyna» engen romandy jazyp shyǵarýyna kedergi keltirmedi.
Serıalǵa tanymal qazaqstandyq akterler tústi. Abaı rólin Aıdos Bektemir somdasa, Muhtar Áýezovtiń jas kezin - Nurlan Álimjan somdady, Ǵalııa rólinde - Kamshat Joldybaeva, Ábishtiń rólinde - Kenen Aqúrpekov, Áıgerimniń rólinde - Aıan Qojbanova, Qaıymnyń rólinde Erkebulan Daıyrov oınady.