Nur-Sultanda qısyq balkondary bar apatty jaǵdaıdaǵy «Orbıta» turǵyn úı kesheni jóndeldi. Turǵyn úı-kommýnaldyq sharýashylyq baǵdarlamasy boıynsha 2020 jyly jańartylǵan kóppáterli turǵyn úı keshenderiniń jalpy sany 50-den asady. Sonymen qatar 100-ge jýyq lıft jóndelip aýystyrylady, dep habarlaıdy Egemen.kz
«Taǵy bir qaýipti kóppáterli turǵyn úı kesheni – «Orbıtany» jóndeýden ótkizdik! Bul TK halyq arasynda qısyq balkondary bar úı retinde belgili. Turǵyndar balkondar qatty jel kezinde qabyrǵalardan alshaqtap, syrtqy plıtalardyń ushatynyn aıtqan. Atalǵan TK 10 jyl buryn problemalyq úı bolyp tanyldy. Ol eki munaradan turady. Nysan sol kezden beri paıdalanýǵa berilmegen. 340 otbasynyń problemasyn sheshý úshin jóndeý júrgizdik. Qaýipti qasbetti tolyq almastyrdyq, TK-nyń negizgi qurylystaryn kúsheıttik, balkondar vıtrajdaryn aýystyrdyq jáne t.b. Kóppáterli turǵyn úı kesheni paıdalanýǵa berildi. Páterler aýmaǵyn ólsheý men turǵyndarǵa tehnıkalyq pasport berý jumystary júrip jatyr», dedi elorda ákimi Altaı Kólginov.
Atalǵan turǵyn úı kesheniniń turǵyny Lázzat Hasanova qatty jelmen balkondar qabyrǵadan alshaqtap ketkenin atap ótti.
«Qatty jel kezinde bizdiń balkondar qabyrǵadan alshaqtap ketti. Páterimde balkon men qabyrǵa arasy ashylyp, sańylaý ulǵaıdy. Jel toqtaǵan kezde balkondar ornyna qaıta tústi. Biz osyndaı qorqynyshty jaǵdaıda ómir súrdik. Úkimet bizge nazar aýdaryp, búlingen qasbetti tolyǵymen aýystyrýǵa kómektesti. Apattyq balkondar tolyǵymen aýystyryldy. Balkondar qorqynyshty jaǵdaıda boldy jáne adam ómirine qaýip tóndirdi», dedi Lázzat Hasanova.
Buǵan deıin osyǵan uqsas máseleler problemalyq «Terrıtorııa komforta – 2» úıinde bolǵan. Onda da aýqymdy jóndeý jumysy júrgizilip, keshen paıdalanýǵa berildi.