Almaty oblysynyń Raıymbek aýdanynda taǵy bir mańyzdy nysan iske qosyldy, dep habarlaıdy Egemen.kz
Osydan birer apta buryn ǵana Sarybastaý aýylynda 90 oryndy bóbekjaı balabaqshasy kúrdeli jóndeýden ótkizilip, qoldanysqa berilse, endi, mine, bes myń halqy bar Saryjaz aýylynda 140 oryndy «Kúnshýaq» bóbekjaı balabaqshasy kúrdeli jóndeýden keıin iske qosyldy.
Aýyl turǵyndarynyń qýanyshyn bólisýge arnaıy barǵan aýdan ákimi Nurjan Qudaıbergenov bıyldyń ózinde aýdan ortalyǵyn aıtpaǵanda, eldi mekenderde birqatar nysandar iske qosylǵanyn atap ótti. Máselen, M.Maqataev, Q.Shormanov, Sh.Ýálıhanov atyndaǵy orta mektepter kúrdeli jóndeýden ótkizilgen, Qaqpaq, Jambyl aýyldarynda jańadan dárigerlik ambýlatorııalar paıdalanýǵa berilgen. «Búgin, mine, Saryjaz aýylynda qaraýsyz bos turǵan burynǵy balabaqsha jańa zamanǵa saı qaıta jańǵyrtylyp, bóbekjaı balabaqshasy retinde ashylyp otyr», degen aýdan basshysy turǵyndardy qýanyshtarymen quttyqtady.
Sonymen qatar osy ǵımaratty kúrdeli jóndeýden ótkizip, jumysty sapaly atqarǵan «Eńbek» JShS-niń dırektory Ábildaev Qurban Táliphanuly bastaǵan qurylysshylar qaýymynyń atyna júrekjardy alǵysyn aıtty.
Saltanatty sátte aýdandyq máslıhattyń hatshysy Erlan Qudabaev, aýdandyq aqsaqaldar keńesiniń tóraǵasy Bekbolat Birbaev, aýdandyq «Qamqor-2» kásipodaǵynyń tóraǵasy Ulyqpan Ábekov, «Eńbek» JShS-niń dırektory Qurban Ábildaev sóz alyp, aýyl turǵyndaryna jyly lebizderin jetkizdi.
Jalpy «Kúnshýaq» bóbekjaı balabaqshasynda 6 topta 140 balapan mektepaldy tálim-tárbıe alatyn bolady. Ǵımarattyń kúrdeli jóndeýine bıýdjetten bıýdjetten 277 mıllıon teńge qarajat bólingen.
Eske salsaq, osydan eki jarym jyl buryn Elbasynyń Jarlyǵymen qaıta qurylǵan Raıymbek aýdany qazir órkendeý ústinde. Aýdandy damytý úshin bıýdjetten 18 mlrd teńgege jýyq qarjy bólingen. Bıylǵy jyldyń ózinde ǵana qurylys jumystaryna 8 mlrd. teńgedeı qarastyryldy, sonyń 3 mlrd teńgesi «Jumyspen qamtý jol kartasy» aıasynda bólindi.