Megapolıstiń memlekettik sáýlet-qurylys baqylaý basqarmasy qurylys jumystarynyń sapasyna turaqty túrde monıtorıng jasaýda, dep habarlaıdy Egemen.kz.
Almaty ákimi Baqytjan Saǵyntaevtyń tóraǵalyǵymen ótken keńeske qurylys kompanııalarynyń jáne kásibı qaýymdastyqtyń ókilderi qatysty. Jıyn barysynda turǵyn úı qurylys salasynda qurylys merzimin saqtaý jáne jumys sapasyn arttyrý máseleleri qaraldy.
Almatyda búgingi kúni 779 qurylys nysany bar, onyń ishinde 533 kommersııalyq obekti. Qalada qurylys jumystaryn barlyǵy 323 qurylys kompanııasy men 135 tehnıkalyq qadaǵalaý uıymy júzege asyrady.
Monıtorıng nátıjeleri boıynsha 2020 jyly qurylys kompanııalarynyń 80%-y jaýapkershilikke tartyldy. 69 kompanııanyń lısenzııalary alty aı merzimge toqtatyldy, 154 kompanııa ártúrli sanattaǵy qurylys lısenzııalarynan aıyryldy.
Qurylys normalaryn buzǵany úshin jyl ishinde salynǵan aıyppuldardyń jalpy somasy 220,3 mln teńgeni qurady. Onyń ishinde jeke tulǵalarǵa – 124 mıllıon teńge, jeke kásipkerlik sýbektilerine 272 mıllıon teńge aıyppul salyndy.
Negizigi olqylyqtar – jobalyq sheshimderden aýytqý jáne qurylys jumystaryn júrgizý barysynda tıisti talaptardy saqtamaý. Mine bular qurylys sapasyna keri áserlerin tıgizýde.
Mysaly, qurylys óndirisin jetkiliksiz uıymdastyrý, beton jumystary tehnologııasyn jáne qaıta toltyrý tehnologııasyn buzý, kólik jolyn qalpyna keltirmeý, qaýipsizdik sharalaryn saqtamaý, kirý jáne operasııalyq baqylaýdyń bolmaýy, jumys kestesinen kesh qalý sııaqty faktiler anyqtaldy.
Tehnıkalyq qadaǵalaý fýnksııalaryn júzege asyrýǵa tıisti baqylaýdyń bolmaýy saldarynan 47 adam jaýapqa tartyldy, onyń 18-iniń jumystary toqtatyldy.
Almaty ákimi B. Saǵyntaev qurylys salasyn baqylaýdy kúsheıtýdi jáne qurylys jumystarynyń sapasyn jaqsartý maqsatynda keshendi sharalar ázirleýdi tapsyrdy.
Usynylǵan is-sharalar mynalar: qurylys júrgizýshilerdiń senimdi reıtıngin qurý, turǵyn úı qurylysy salasynda tájirıbesi joq kompanııalardyń qyzmetine shekteý qoıý. Bulardan ózge, tapsyrys berýshige tyıym salý jáne bekitilgen jumys jobasyna qurylys materıalyna qatysty avtorlyq qadaǵalaýdyń ózgerister engizýi úshin tıisti tetikterdi qoldaný múmkindigi qarastyrylýda.
Tehnıkalyq qadaǵalaý esebiniń túrin ózgertý de taǵy bir shara bolyp tabylady, munda oryndalǵan jumystardyń kestesi jáne oǵan qansha adamnyń tartylǵany kórinis tabýy tıis.