«Atlantıkalyq keńes» atty bedeldi amerıkandyq taldaý ortalyǵy Qazaqstannyń azamattardy soǵys aımaqtarynan qaıtarý jáne olardy qoǵamǵa qaıta ıntegrasııalaý tájirıbesin talqylaýǵa arnalǵan onlaın konferensııa ótkizdi, dep habarlaıdy Egemen.kz
Is-sharaǵa Qazaqstan Respýblıkasy Syrtqy ister mınıstriniń orynbasary Erjan Ashyqbaev, Memlekettik departamenttiń Zorlyq-zombylyq ekstremızmen kúres jónindegi úılestirýshiniń orynbasary Krıstofer Harnısh jáne AQSh-tyń jetekshi sarapshylary qatysty.
E.Ashyqbaev vebınarǵa qatysýshylardy soǵys aımaqtarynan otandastardy qaıtarý boıynsha júrgizilgen operasııanyń barlyq kezeńderimen, sondaı-aq olardy beıbit qoǵamǵa qaıta ıntegrasııalaý boıynsha júrgizilip jatqan jumystarmen qysqasha tanystyrdy.
Qazaqstandyq dıplomat «Jýsan» operasııasy birinshi kezekte radıkaldy ıdeologııanyń qurbany bolǵan áıelder men balalardy qorǵaýǵa baǵyttalǵan gýmanıtarlyq mıssııa ekenin atap ótti. Bul QR Prezıdenti Qasym-Jomart Toqaevtyń «Halyq únine qulaq asatyn memleket» tujyrymdamasyn, sondaı-aq Tuńǵysh Prezıdent - Elbasy Nursultan Nazarbaevtyń terrorızmge qarsy kúres salasyndaǵy mańyzdy halyqaralyq bastamalaryn naqty iske asyrýdyń jarqyn mysaly.
AQSh Memlekettik departamentiniń ókilderi men amerıkandyq sarapshylar óz sózderinde qaıtaryp ákelingen adamdardy soǵys aımaqtarynan qaıtarý jáne qaıta ıntegrasııalaý máselesinde Qazaqstannyń álemdik kóshbasshylyǵyn atap ótti.
Olar qazaqstandyq tájirıbe «úlgi tutatyn» jáne osy óte kúrdeli problemany sheshýge jaýapty tásildiń kórinisi dep málimdedi.
Sonymen qatar Qazaqstan Úkimetiniń ashyqtyǵy, yntymaqtastyqqa jáne dıalog ornatýǵa daıyndyǵy aıryqsha atap kórsetildi.
Brıfıngke qatysýshylar Qazaqstan álemdik qoǵamdastyqtyń terrorızmge qarsy kúsh-jigerine jáne BUU Qaýipsizdik Keńesiniń tıisti qararlaryn engizýge aıtarlyqtaı úles qosyp otyrǵanyn atap ótti.