Bıylǵy epıdemııalyq jaǵdaıǵa jáne elordanyń bas sanıtarlyq dárigeriniń qaýlysyna baılanysty kreshenıe merekesine arnalǵan oıyqtarda dástúrli jappaı shomylý ótkizilmeıdi, dep habarlaıdy Egemen.kz ákimdiktiń resmı saıtyna silteme jasap.
18 qańtardan 19-yna qaraǵan túni pravoslav hrıstıan dinin ustanýshylar úshin kreshenıe merekesi ótedi. Alaıda bıyl epıdemıologııalyq ahýaldyń turaqsyzdyǵyna baılanysty Nur-Sultanda arnaıy oıyq ornatylmaıdy.
«Koronavırýs ınfeksııasynyń taralýyna jol bermeý maqsatynda bıyl kreshenıe merekesine arnalǵan oıyqtarda dástúrli jappaı shomylýǵa tyıym salynǵan. Qulshylyq etý kezinde sanıtarlyq-epıdemıologııalyq talaptar qatań saqtalýy tıis, ıaǵnı ǵıbadathana ishiniń 30%-y ǵana tolýy tıis jáne buqaralyq is-sharalardy ótkizýge mindetti túrde tyıym salyný qajet», — dedi Nur-Sultan qalasynyń Bas memlekettik sanıtarlyq dárigeri Sarhat Beısenova.
Din isteri basqarmasynyń basshysy Nurdáýlet Álmuhanovtyń aıtýynsha mereke kúnderi shomylýǵa jáne jurtshylyqtyń jınalýyna jol bermeý maqsatynda monıtorıngtik toptardyń kúsheıtilgen kezekshiligi uıymdastyrylady.
Esterińizge sala keteıik, qazirgi ýaqytta elorda koronavırýs boıynsha «qyzyl» aımaqqa ótip ketýdiń aldynda tur.