Jambyl aýdany, Qyzylqaınar aýylynda talaı jyldan beri kópshiliktiń kókeıkesti máselesi sheshilip, sý júıesi tartyldy, dep habarlaıdy Egemen.kz.
Bul maqsatqa «Jumyspen qamtýdyń jol kartasy» memlekettik baǵdarlamasy aıasynda 740 mıllıon 760 myń teńge bólinip, 950 aýlaǵa aýyzsý júıesi júrgizildi. Munda «Araıstroımarket-2003» jaýapkershiligi shekteýli seriktestigi qurylys jumystaryn júrgizip, 3000 turǵyny bar aýylǵa bir jyl ishinde sý tartyp berdi. Osy oraıda, Jambyl aýdany ákiminiń orynbasarlary Erlan Qydyralyuly men Nurlan Nesipbekov aýyldyqtarmen kezdesip, kópshilikti kópten kútken qýanyshymen quttyqtady. Olar óńirde aýyzsý máselesi «Jumyspen qamtýdyń jol kartasy», «О́ńirlerdi damytý» memlekettik baǵdarlamalary aıasynda júıeli túrde sheshimin taýyp kele jatqanyn, búginde aýdanǵa qarasty 42 eldimekenniń 29-y ortalyqtandyrylǵan aýyzsýmen qamtylǵanyn jetkizdi. Al, bıylǵy jyly Shoqaı aýylyndaǵy aýyzsý qubyrynyń qurylysy aıaqtalyp, paıdalanýǵa beriledi dep josparlanǵan.
Osy ýaqytqa deıin Qyzylqaınar aýylynyń turǵyndary Keńes zamanynda tartylǵan aýyzsýdy paıdalanyp kelgen. Alaıda, taý bókterinen keletin sýdyń sapasy sońǵy kezde tómendeı bastaǵan. Turǵyndar sý qorynyń jyl saıyn tómendep kele jatqanyn, aýyldaǵy sý qubyrlarynyń tozǵanyn aıtyp, talaı ret másele kótergen bolatyn. Al, búginde aýyl turǵyndary dán rıza. «Jańa sý munarasy bizdiń kópten kútken tileýimiz edi. Araǵa 70 jyl salyp, aýylishilik kóshege qubyrlar tartylyp, ár aýlaǵa sý tetikteri ornalastyryldy. Osy oraıda aýyldaǵylardyń turmysyn jaqsartýǵa úles qosyp júrgen barsha azamattarǵa alǵysymdy bildiremin», dedi aýyl turǵyndary atynan Kenjetaı Qurmanqulov. Endigi kezekte árbir turǵyn kóshedegi sý jelisine qosylýy qajet.
Jambyl oblysy