Atyraý oblysy boıynsha Qylmystyq-atqarý júıesi departamentine qarasty probasııa qyzmetiniń esebinde turǵan sottalǵan azamat eriktiler qataryna qosylyp, halyqtyń alǵysyna bólenip júr, dep habarlaıdy Egemen.kz Polisia.kz saıtyna silteme jasapp.
Alaıaqtyq qylmysy úshin eki jyl alty aı merzimge sottalǵan azamat Atyraýda koronavırýs ınfeksııasy órship turǵan kezde oblystyq aýrýhanada eriktiler qatarynda jaǵdaıy aýyr naýqastarǵa kómektesken. Ol qazir de eriktilikten qol úzbeı, jaǵdaıy tómen otbasylarǵa kómektesedi.
«Jaz aılarynda oblystyq aýrýhanada ottegi ballondaryn tasyp, naýqastarǵa qaraılastyq. Koronavırýstan qoryqpaı, úlken kisilerge járdemdesý – azamattyq boryshym dep bilemin», deıdi 36 jastaǵy sottalǵan azamat.
Ol jańa jyl qarsańynda ózge de eriktilermen birigip, naýqas balalar men jaǵdaıy tómen otbasylarǵa syılyq taratqan.