Qyzylordada 10 jasar balanyń ólimine qatysty isti tekserý úshin komıssııa qurylady, dep habarlaıdy Egemen.kz Qyzylorda oblysy ákiminiń saıtyna silteme jasap.
2021 jyldyń 24 qańtarynda qaıtys bolǵan oqýshyda koronavırýs ınfeksııasy anyqtalmaǵan.
«2010 jyly týǵan bala. Denesinde bórtpe paıda bolyp, aýyrsyný bolǵan. Basynda bala úıinde emdeldi. Aýrýhanada tekserilgennen keıin balany juqpaly aýrýlar aýrýhanasyna jatqyzdy. Koronavırýsqa synama alyndy, nátıjesi teris. Sondyqtan 19 qańtarda kópsalaly balalar aýrýhanasyna aýystyrǵan. Respýblıkalyq mamandardan da keńes alyndy. О́kinishke qaraı, 24 qańtarda oqýshy qaıtys boldy. Negizgi sebep - júrek, ókpe jetkiliksizdigi. Ári qaraı jumys isteý úshin qosymsha komıssııa quramyz», dedi oblystyq densaýlyq saqtaý basqarmasynyń basshysy Sábıt Pazylov.
Saıt málimetine súıensek, qaza tapqan bala Qyzylordadaǵy Osıpenko atyndaǵy №8 mekteptiń 4 synyp oqýshysy eken.
«Bala birinshi oqý toqsanynan bastap onlaın-formatta qashyqtan bilim alǵan. Balanyń akademııalyq úlgeriminde problemalar bolǵan joq. Qashyqtan oqytýǵa baılanysty balany elektrondy tehnıkamen qamtamasyz etip, pedagogter tarapynan keri baılanys júrgizilip otyrǵan», dedi oblystyq bilim basqarmasynyń basshysy Aqzıra Qasymova.
Qazirgi ýaqytta oblys boıynsha qashyqtan 89 258 oqýshy (53 paıyz), dástúrli túrde 80 636 oqýshy (47 paıyz) bilim alyp jatar.